Կառավարությունը կոմպրոմիսի չի գնալու. Նիկոլ Փաշինյանը՝ Իջևանի իրադարձությունների մասին

Կառավարությունը մտադիր չէ ապօրինի որևէ կոմպրոմիսների գնալ։ Այս մասին այսօր՝ հուլիսի 20-ին, «Իմ քայլը հանուն Շիրակի մարզի» բիզնես համաժողովի ժամանակ իր ելույթում ասաց ՀՀ վարչապետ Նիկոլ Փաշինյանը` Իջևանի իրադարձություններին։

«Ինձ համար զարմանալի է, որ Հայաստանում հնչում են ձայներ, թե ապօրինի ծառահատումներն այդ մարդկանց հացի փողն էր։ Սա ինձ համար անհասկանալի մոտեցում է, որովհետև 1000 դրամ վերցնող երբեմնի ՃՈ աշխատակցի համար այդ 1000 դրամն էլ իր ապրուստի փողն էր, կոռուպցիոների վերցրած կաշառքը իր ապրուստի փողն է, գողություն անողի ապրուստի փողն իր գողություն է։ Մենք այսպիսի կոմպրոմիսների չենք գնալու։ Մենք այսօր արդեն ստեղծել ենք բավարար դաշտ, որ ՀՀ քաղաքացիները ստեղծարար աշխատանքով իրենց հացը վաստակելու հնարավորություն ունենան։ Այս հնարավորությունները դեռ կատարելության չեն հասել, մենք հետևողականորեն աշխատելու ենք այս ուղղությամբ»,–նշեց նա։

Հիշեցնենք, Operativ լրատվականը ավելի վաղ հաղորդել էր, որ օրերս իջևանցիները փակել էին ՀՀ-Վրաստան միջպետական ճանապարհը՝ անտառահատման օրենսդրության խստացման դեմ։ Բախում էր տեղի ունեցել ցուցարարների և ոստիկանների միջև։

Իջևանում ոստիկանների և ճանապարհը փակած իջևանցիների միջև տեղի ունեցած բախումներից հետո ձերբակալվածների հարազատները հավաքել էին Իջանի մարզպետարանի դիմաց և պնդում էին ու վանկարկում, որ բախումը սկսվել էր, որովհետև միլիցեքը խմած են եղել:

Ոստիկանությունը գիշերը տներից մարդկանց բերման էր ենթարկել։ Ցուցարարները պնդում են, որ անտառահատմամբ են կարողանում ապահովել իրենց ապրուստը։

Այսօր էլ Operativ լրատվականը Մամուլ բաժնում հաղորդել էր, որ՝ Նորանոր «իջևաններ» են սպասվում. ձկնորսության արգելքի պատճառով ծովագյուղցիները միջպետական ճանապարհ կփակեն, գրում է «Փաստ»-ը:

Արամ Սարգսյանն էլ Իջևանում Ոստիկանների պահվածքը անվանել էր ամենաթողություն: