Պարոն Գաբունիան ինձ համար այլևս լրագրող չէ. Պոզներ

Լրագրող Վլադիմիր Պոզները մեկնաբանել է վրացական «Ռուսթավի 2» ալիքում սկանդալը, որի աշխատակիցը եթերում հայհոյել էր Վլադիմիր Պուտինին:

«Ցանկացած երկրում, համենայնդեպս՝ ինձ ծանոթ, լրագրողը, որն իրեն թույլ կտար այն, ինչ թույլ տվեց պարոն Գաբունիան, կհեռացվեր եւ հազիվ թե կարողանար այդ մասնագիտությամբ աշխատանք գտնել»,- իր կայքում նշել է Պոզները:

Նրա խոսքով՝ ամեն մարդ իր կարծիքը հայտնելու իրավունք ունի, սակայն ոչ մեկն իրավունք չունի մեկ ուրիշին վիրավորելու եւ օգտագործելու անվայելուչ բառապաշար, եւ սա հատկապես վերաբերում է լրագրողներին:

Վրաստանում հիմա «ձայների համար պայքար» է ընթանում, որում կարող է հաղթել նա, «ով ավելի հմտորեն կխաղարկի ռուսատյացության քարտը», կարծիք է հայտնել հեռուստահաղորդավարը:

«Պարոն Գաբունիան անձամբ ինձ համար այլեւս լրագրող չէ՝ ոչ թե հակառուսական դիրքորոշման պատճառով, որի իրավունքն ունի, այլ լրագրության սկզբունքների խախտման»,- եզրափակել է Պոզները:

Հիշեցնենք, ավելի վաղ Operativ լրատվականը, հղում կատարելով Նովոստի Գրուզիի պարբերականին, հաղորդել էր, որ «Ռուսթավի 2»-ի հաղորդավարին սկանդալային  եթերից հետո աշխատանքից ազատել են, իսկ «Վրացական երազանքում» «Ռուսթավի 2»-ի սկանդալային եթերն անվանել են պետհեղաշրջման փորձ: