Ելիսեյան պալատից գողացել են արվեստի մի քանի գործեր

Ֆրանսիական ոստիկանությունը սկսել է Ֆրանսիայի նախագահի գլխավոր նստավայրից՝ Ելիսեյան պալատից կատարված արվեստի մի քանի ստեղծագործությունների կողոպուտի հետաքննությունը, տեղեկացնում է ՏԱՍՍ-ը՝ հղում կատարելով France Info-ին։

Նրա տեղեկություններով՝ հետաքննությունը հունիսից վարում է Փարիզի ավազակության դեմ պայքարի բրիգադը։ Բողոքը տրվել էր Գեղարվեստի ազգային կենտրոնի կողմից։ Դրա փորձագետները հայտնաբերել էին յոթ ստեղծագործությունների կողոպուտը՝ փայտից եւ տերակոտից արձանիկներ, ինչպես նաեւ մեկ բրոնզե կիսանդրի։ Դրանց ընդհանուր արժեքը մի քանի հազար եվրո է։

Ռադիոկայանի տվյալներով՝ արձանիկների կորուստը հայտնաբերվել է Ելիսեյան պալատում ստեղծագործությունները հաշվագրելիս, 2012-ի նոյեմբերից մինչեւ 2013 թվականը ժամանակահատվածում։ Արձանիկները եւ կիսանդրին, ինչպես նաեւ մի շարք այլ ստեղծագործություններ, պալատին են հանձնվել 1879-1984 թվականներին Կահույքի պետական վարչության կողմից, որոնք ստեղծվել էին դեռեւս 14-րդ դարում։ Արձանիկների որոնումները Ելիսեյան պալատում արդյունք չեն տվել։

Հազարավոր դեպքեր

Ինչպես հիշեցնում է այս առիթով Le Parisien թերթը, Ֆրանսիայում արժեքավոր ստեղծագործությունների կորստի բազմաթիվ դեպքեր կան, որոնք Կահույքի վարչությունը, համաձայն առկա կանոնների, տալիս է տարբեր պետական ատյանների, ընդհուպ մինչեւ քաղաքապետարան։ Նման կորուստները, հատուկ վերահսկիչ հանձնաժողովի տվյալներով, որը ստեղծվել է 1997 թվականին Հաշվիչ պալատի ցուցումով, հասնում են 50 հազարի։ Ընդ որում՝ դրանք գողացել են անգամ այնպիսի մանրակրկիտ պահպանվող տարածքներից, ինչպիսին են Մաթինյոնի պալատը (վարչապետի նստավայրը), Ազգային ժողովը (խորհրդարանի ստորին պալատը) եւ Ֆրանսիայի արտասահմանյան դեսպանությունները։

Ելիսեյան պալատում կորել է ավելի քան հազար ստեղծագործություն։ Դրանցից մեկը՝ մեծ բրոնզե ջահը, որը կորել է 25 տարի առաջ, վերջերս հայտնաբերվել է պալատի օժանդակ շինություններից մեկում։ Ինչպես պարզվել է, այն սխալմամբ դրել են ոչ այնտեղ, որտեղ պետք է դնեին։

Վերջին տարիներին վերահսկիչ հանձնաժողովը Ֆրանսիայի նախագահի նստավայրին խորհուրդ է տվել 87 բողոք ներկայացնել արվեստի ստեղծագործությունների հափշտակման մասին։ Իր կողմից՝ Մաթինյոնի պալատն արդեն ոստիկանություն եւ քննչական մարմիններ է ուղարկել մոտ վեց տասնյակ բողոք 2015-ից։ 2018-ի վերջին դրանց ընդհանուր թիվը կազմել է 2300, ընդ որում՝ եւս 900 բողոք կարող է տրվել առաջիկա ամիսներին։

Մաթինյոնի պալատից կորած ստեղծագործությունների մեջ է կլոր սեղանիկը, որը ֆրանսիացի ժամանակակից դիզայներ եւ ճարտարապետ Ժան-Միշել Վիլմոթի ձեռքի գործն է։ Բնակկոմունալ տնտեսության նախարարությունից կորել է «Վեներան եւ Ամուրը» ոսկեզօծ քանդակը։ Արդարադատության նախարարության խստորեն պահպանվող շենքից գողացվել է ֆրանսիացի հայտնի նկարիչ Ժյուլ Դյուպրեի՝ գեղագրության բարբիզոնյան դպրոցի հիմնադիրներից մեկի նկարը։

Գողերի պատիժը

Պետությանը պատկանող նստավայրերից արվեստի գործերի հափշտակումների մասին գործերով Ֆրանսիայում արդեն դատապարտվել են մի քանի բարձրաստիճան ծառայողներ։ Նրանց մեջ է Լոզեր դեպարտամենտի (երկրի հարավ) պրեֆեկտը, որը նստավայրից գողացել է Լյուդովիկոս 16-րդի ժամանակաշրջանի բազկաթոռներ եւ Նապոլեոն Երրորդի ժամանակվա աթոռներ, ինչպես նաեւ թանկարժեք անկողնային սպիտակեղեն եւ սփռոցներ։

Երկու տարվա բանտարկություն, հինգ տարով քաղաքացիական իրավունքներից զրկում եւ 150 հազար եվրո տուգանք. այսպիսին էր Վերին Լուար հարավային դեպարտամենտի պրեֆեկտի տեղակալի դատավճիռը։ Նա պատճենով էր փոխարինել ռուսական ծագում ունեցող նկարչուհի Նատալյա Գոնչարովայի (1881-1962) «Գեորգինաներ» թանկարժեք կտավը։ Դա հայտնաբերվել էր, երբ ստեղծագործությունը տարել էին ցուցադրելու ցուցահանդեսներից մեկում։ Կտավը վաճառվել էր գողացողի կողմից ինտերնետով, ընդամենը 12 հազար եվրոյով։ 2012-ին Լոնդոնի Sotheby's աճուրդում դրա սակարկությունները հասել են 103 250 եվրոյի (մոտ 117 հազար դոլար)։