Սեքսը բոլորին է հետաքրքիր. երիտասարդ հայ ստեղծագործող

Օրերս Operativ.am-ի խմբագրությունը նամակ ստացավ, որում երիտասարդ գրողն ուղարկել էր, իր «Բռնաբարված հոգիներ» պատմվածքը: Պատմվածքը կայքում տեղադրելուց հետո այն բավականին քննարկվեց և մենք որոշեցինք խոսել անձամբ հեղինակի հետ: Սև Մանգուշյանը 21 տարեկան է, սովորում է Երևանի թատրոնի և կինոյի պետական ինստիտուսի Խաղարկային ֆիլմի ռեժիսուրա բաժնում, ուզում է իր գրած պատմվածքների հիման վրա ֆիլմ նկարահանել:

-Սևը Ձեր իսկակա՞ն անունն է, թե՞ «Բռնաբարված հոգիների» թեմային համապատասխան` մարդասպանություն, ինքնասպանություն, փորձել եք մռայլ կերպար ստեղծել: 

- Անունս Սևակ է: Իմ պատմվածքները ես մռայլ չեմ համարում: Շեշտը դնելով մարդկային ամենափոքր արատներից մինչև մարդասպանության վրա, փորձում եմ ցույց տալ դրանց զզվելի ու սարսափելի լինելու չափը: Ես չեմ ցանկացել միակ ելքը համարել ինքնասպանությունը, այլ փորձել եմ ինքնասպանությամբ ցույց տալ մեր շրջապատում տեղի ունեցող երևույթների սարսափելի լինելու աստիճանը: Յուրաքանչյուրը կարող է ելքն իր ձևով գտնել: Ի վերջո պատմվածքն ունի իրական հիմքեր, ու հերոսների մեծ մասն իրական են: Այնուամենայնիվ, ուզում եմ ասել, որ չնայած ամեն ինչի, յուրաքանչյուր մարդ ինքն է իր կյանքի տերը և ինքն է որոշում, թե ինչ անի իր կյանքի հետ: Պատմվածքում ես գլխավոր հերոսի անունը նշել եմ ընդամենը մեկ անգամ, որպեսզի ընթերցողը չկենտրոնանա կոնկրետ անձի վրա, այլ հասկանա, որ հերոսի փոխարեն կարող էր լինել ինքը:

 -Հերոսներից որևէ մեկը Ձեզ մարմնավորո՞ւմ է: 

-Ինձ թվում է` ոչ, իմ և գլխավոր հերոսի միակ նմանությունն Աննա Կարենինային սիրելն է. Աննա Կարենինային` որպես հերոսուհի: Չէի ցանկանա խոսել իրական հերոսների մասին:

-Պատմվածքում շատ է բռնությունն ու սեքսը, կարծում եք` դրա՞նք են երիտասարդներին ամենահետաքրքող թեմաները:

-Սեքսն ինձ թվում է բոլորին է հետաքրքրում: Հարցն այն է, թե ով ինչպես է դա ընկալում: Սեքս, սեր, կիրք ոչ թե այլասերվածություն: Իսկ բռնության մասին ոչինչ ասել չեմ կարող: Համենայնդեպս իմ պատվածքում ես սեքսի մասին չեմ գրել, որովհետև դա հետաքրքիր է երիտասարդությանը, այլ գրել եմ` որպես մեր շուրջը կատարվող իրականություն:

-Որտե՞ղ կարող են ընթերցողները գտնել ձեր պատմվածքները:

-Իմ գրվածքները առանձնացված որևէ բլոգում կամ կայքում չկան, բայց մտածում եմ այդ ուղղությամբ: Ես պատվածքներ գրելու եմ այնքան, մինչև այլևս գրելու բան չունենամ և այնքան, ինչքան ինձ անհրաժեշտ է, որովհետև ինձ անհրաժեշտ է գրելը: Գրելու ճանապարհով լուրջ նպատակներ չունեմ, ինձ համար առաջին տեղում կինոն է, գրելը կփորձեմ զուգահեռ:

Զրուցեց Գայանե Շահինյանը