Գերմանիայում կանխվել է քաղաքական սպանությունների մի ամբողջ շարք

ԶԼՄ-ների տեղեկատվությամբ՝ «Հյուսիսային խաչ» աջ ծայրահեղական խմբավորումը ծրագրել էր քաղաքական սպանությունների մի ամբողջ շարք ամբողջ Գերմանիայում, տեղեկացնում է DW-ն։

Ծայրահեղականները կազմել էին պոտենցիալ զոհերի ցուցակները նրանց անձնական տվյալներով, հուլիսի 6-ին տեղեկացնում են Redaktionsnetzwerk Deutschland (RND) մեդիա-խմբի պարբերականները՝ հղում կատարելով Քրեական ոստիկանության դաշնային գերատեսչության հարցաքննությունների արձանագրություններին։

Գերմանիայի դաշնային դատախազությունը ենթադրում է, որ աջ ծայրահեղականները Մեքլենբուրգ-Առաջավոր Պոմերանիա եւ Բրանդենբուրգ արեւելյան երկրամասերից զբաղվել են տվյալների հավաքմամբ քաղաքական հակառակորդների մասին։ Փաստաթղթերում եւ էլեկտրոնային կրիչներում, որոնք առգրավվել են «Հյուսիսային խաչի» անդամների խուզարկությունների ժամանակ 2017 թվականի օգոստոսից մինչեւ 2018-ի ապրիլ շրջանում, կան նրանց հակառակորդների 25 հազար ազգանուններ եւ հասցեներ, որոնք ապրում են ամբողջ Գերմանիայում։

RND-ի տվյալներով՝ «Հյուսիսային խաչի» անդամները հավաքել են գերազանցապես ձախ քաղաքական թեւի ներկայացուցիչների տվյալները, որոնց մեծ մասը դրական է արտահայտվել փախստականների եւ ապաստան խնդրողների մասին։ Մինչ այժմ իշխում էր այն կարծիքը, որ խմբավորումը հավաքել է միայն տվյալներ մոտ 30 պոտենցիալ զոհի մասին, որոնք ապրում են նույն շրջանում։

Ընդ որում՝ համաձայն քննության գնահատականի, ուլտրաաջերը ծրագրել էին իրենց քաղաքական հակառակորդների նպատակաուղղված սպանություններ։ Ադ կասկածներն ուժեղացել են BKA գերատեսչության կողմից «Հյուսիսային խաչի» անդամներից մեկի հարցաքննությունից հետո։ Մեքլենբուրգ-Առաջավոր Պոմերանիայի բունդեսվերի ռեզերվիստների միավորման նախկին փոխղեկավար Հորսթ Ս.-ն (Horst S.) տեղեկացրել է, որ «ձախերի» ցուցակները կազմվել են նրանց ֆիգուրանտներին ոչնչացնելու նպատակով՝ «կոնֆլիկտի դեպքում», նշում են պարբերականները։

«Հյուսիսային խաչի» եւս մեկ անդամ՝ փաստաբան Յան Հենդրիկ Հ-ն., ծրագրել է «Իքս օրը» հանցակիցներին զինել բունդեսվերի կնիքով անցագրերով, որոնք թույլ կտային նրանց ավելի արագ ժամանել անհրաժեշտ վայր, ասվում է այնուհետեւ։

«Հյուսիսային խաչի» հիմնադիր, ոստիկանության հատուկ ջոկատի աշխատակից Մարկո Գ.-ն հունիսի կեսին կալանքի տակ է վերցվել։ Քննության տվյալներով՝ նա եւ նրա երեք ծառայակիցներ հափշտակել էին զինամթերքներ ոստիկանական պաշարներից։ 2017-ի օգոստոսից խմբավորման հանդեպ վարվում է հետաքննություն ահաբեկչական հարձակման կազմակերպման կասկածանքով։

Հունիսի սկզբին Գերմանիան ցնցեց քաղաքական գործչի աղմկահարույց սպանությունը, որն աջակցություն էր հայտնել փախստականներին։ Վալտեր Լյուբկեի մարմինը գտնվել էր հունիսի 2-ի գիշերը նրա Վոլֆհագենի տան սանդղավանդակում։ Դիահերձումը ցույց է տվել, որ 65-ամյա քաղաքական գործչի գլխին կրակել են կարճափող զենքից՝ մոտ տարածությունից։ Սկզբում հետաքննությունը հանձնարարվել էր 50 մարդուց բաղկացած հատուկ հանձնաժողովին, հետո այն վերցրեց Գերմանիայի Կառլսռուեի դաշնային դատախազությունը։ Հետաքննության կարծիքով՝ սպանությունը կարող էր ունենալ աջ ծայրահեղական աստառ։