Կառավարությունն այսօրվա՝ հունիսի 27-ի նիստում հաստատեց «Երևանի թատրոնի և կինոյի պետական ինստիտուտ»-ի ռեկտորին

Կառավարությունն այսօր՝ հունիսի 27-ի նիստում Լիլիթ Արզումանյանին հաստատեց «Երևանի թատրոնի և կինոյի պետական ինստիտուտ» պետական ոչ առևտրային կազմակերպության ռեկտորի պաշտոնում:

Կրթության, գիտության, մշակույթի և սպորտի նախարար Արայիկ Հարությունյանը տեղեկացրեց, որ Արզումանյանը մայիսի 22-ի կառավարման խորհրդի նիստում ստացել է 14 կողմ ու 9 դեմ ձայն։

Նախարարը նշեց, որ Լիլիթ Արզումանյանը 2013-2018 թվականներին ղեկավարել է Բարձրագույն որակավորման հանձնաժողովը, բայց սերտ կապ է ունեցել արվեստի ոլորտի հետ, Հանրային հեռուստատեսությամբ վարել է «Թատերական գրասենյակ», «Մեր թատրոնը» հաղորդաշարերը, մի շարք խաղարկային ֆիլմերի հեղինակ է, եղել է Լեզվի բարձրագույն խորհրդի անդամ, ինչպես նաև մի շարք գեղարվեստական խորհուրդների անդամ:

Լիլիթ Արզումյանը շնորհակալություն հայտնեց՝ նշելով, որ ուրախ է, որ մասնակիցն է լինելու երկիրը կառուցելու սկսված գործընթացին. «Ես պարոն Հարությունյանին խնդրել էի օգնություն, քանի որ շատ վատ վիճակում է ինստիտուտի շենքը։ Մեզ հատկացվեց գումար՝ 10 միլիոն, շենքի 70 տոկոսն արդեն վերանորոգված է»,-ասաց նա։

Վերջում վարչապետը արձագանքեց. «Ձեր ինստիտուտի շրջակայքը, երևի թե, մեկ-երկու ամիս առաջ սեփական ձեռքերով եմ մաքրել, հույս ունեմ՝ այդ մաքրությունը կպահպանվի»: