Երևանի պատերին արդեն ոչ թե հուշատախտակներ են, այլ թոխմախի տապանաքարեր. Կամո Արեյան

Երևանի ավագանին իր այսօրվա՝ հունիսի 26-ի նիստում համաձայնություն տվեց, որ ՀՀ վաստակավոր երկրաբան, դոկտոր, պրոֆեսոր Սողոմոն Բալյանի հիշատակը հավերժացնող հուշատախտակ տեղադրվի Հանրապետության փողոց հ. 69 հասցեում:

ԲՀԿ խմբակցության անդամ Միքայել Մանրիկյանը նկատեց, որ եթե այսպես շարունակվի, Երևանի բոլոր շենքերը կդառնան հուշահամալիրներ: Նա կոչ արեց կարգավորել հարցը, որպեսզի հուշատախտակներ տեղադրելիս հաշվի առնվի տվյալ շենքի բնակիչների կարծիքը:

Խնդրին անդրադարձավ նաև քաղաքապետի խորհրդական Կամո Արեյանը՝ նշելով, որ այս առումով բաց հարցեր կան. «Նախ ում կարելի է թույլատրել. Մենք շենքեր ունենք, որոնց վրա արդեն տեղ չկա: Չարենցի 4 շենքն ամբողջությամբ հուշատախտակ է: Ժամանակին արվեստի մեծերի շենքը՝ Մաշտոցի 48-ը, պետությունն այնքան խստապահանջ էր, որ այնտեղ տեղ գտան միայն Օլգա Գյուլազյանի, Վաղարշ Վաղարշյանի, Գուգեն Գաբրիելյանի և Հրաչյա Ներսիսյանի հուշատախտակները: Հարցը պետք է կարգավորվի, ում թույլատրել և ինչպես թույլատրել»:

Կամո Արեյանը նաև նկատեց. «Երևանի պատերին արդեն ոչ թե հուշատախտակներ են, այլ թոխմախի տապանաքարեր և դա նորություն չէ: Չեմ ուզում անուններ թվարկել, բայց այդ հուշատախտակները իրենց չափերով, ձևով և կախված վիճակով չեն զիջում թոխմախի տապանաքարերին: Ժամանակն է, որ մեկ միասնական էսքիզային տարբերակ գործի ամբողջ քաղաքում, որը պարտադիր կլինի բոլորի համար»:

Քաղաքապետ Հայկ Մարությանը համաձայնեց՝ նշելով, որ մինչև սեպտեմբեր ժամանակը բավարար է այդ հարցը լուծելու համար:

Նշենք, որ 1945թ. Սողոմոն Բալյանը գիտական աշխատանքի է անցել ՀԽՍՀ ԳԱ էկոնոմիկայի բնագավառում: 1949թ. տեղափոխվել է երկրաբանության ինստիտուտ, պաշտպանել թեկնածուական, 1967թ.` դոկտորական ատենախոսություն, 1968թ. ստացել պրոֆեսորի կոչում: 1951թ. աշխատել է ԵՊՀ-ում, 1969-1997թթ. եղել է ԵՊՀ քարտեզագրության և գեոմորֆոլոգիայի ամբիոնի հիմնադիր վարիչը:

Սողոմոն Բալյանը հեղինակ է շուրջ 120 գիտական հոդվածների, քարտեզների, մենագրությունների: Նա ուսումնասիրել է Հայկական լեռնաշխարհի և դրան հարող շրջանների կառուցվածքային ու կիրառական գեոմորֆոլոգիայի հիդրոերկրաբանության հարցերը։

Նրա գիտական ուսումնասիրութունները նվիրված են ռեգիոնալ գեոմորֆոլոգիայի հարցերին, լավատակ ջրերի խնդրին, պլեյստոցենյան սառցապատումներին, հնէաշխարհագրությանը, նորագույն տեկտոնիկային, կիրառական գեոմորֆոլոգիային և գեոմորֆոլոգիական քարտեզագրմանը:

Նրա հետազոտությունների յուրատեսակ հանրագումարն է «Հայկական լեռնաշխարհի ու հարակից մարզերի կառուցվածքային գեոմորֆոլոգիան» (Երևան, 1969) աշխատությունը: Արժանացել է մի շարք պետական պարգևների և մրցանակների: Սողոմոն Բալյանը մահացել է 2002թ. Երևանում:

Սողոմոն Բալյանի հիշատակը հավերժացնող հուշատախտակը Հանրապետության փողոց հ. 69 հասցեում փակցնելու վերաբերյալ միջնորդություններ են ներկայացվել Երևանի պետական համալսարանի, ՀՀ ԳԱԱ նախագահ Ռ. Մարտիրոսյանի, Երևանի ավագանու անդամ Ա. Խաչատրյանի և ընտանիքի կողմից:

Հուշատախտակի պատրաստման և տեղադրման ծախսերը հոգալու է Սողոմոն Բալյանի ընտանիքը: