ԱՄՆ-ի և Իրանի միջև հակազդեցությունը կարող է հանգեցնել համաշխարհային պատերազմի. Մալազիայի վարչապետ

Միացյալ Նահանգները հրահրում են Իրանին, եւ սխալվելու աճող վտանգները կարող են հանգեցնել համաշխարհային պատերազմի, համարում է Մալազիայի վարչապետ Մահաթհիր Մուհամադը:

«Նախ, նրանք (ԱՄՆ) դուրս եկան միջուկային համաձայնագրից, իսկ այժմ նրանք ուղարկում են ռազմական նավեր դեպի Պարսից ծոց եւ կատարում են քայլեր, որոնք սադրանք են Իրանի նկատմամբ»:

«Եթե նրանք պատերազմ սկսեն, դա չի լինի Իրանի պատերազմը Ամերիկայի դեմ: Դա կվերածվի համաշխարհային պատերազմի»,-համարում է նա: Նրա խոսքով՝ մյուս երկրները, որոնք չեն ցանկանում տեսնել միջուկային զենքի կիրառումը, պետք է գան եւ դադարեցնեն այն:

Ավելի վաղ Թրամփը հայտարարել էր, որ չէր չեղարկել Իրանին հարվածելու որոշումը: «Ես երբեք չեմ չեղարկել Իրանի ուղղությամբ հարվածները, ինչպես մարդիկ սխալ հաղորդում են, ես պարզապես թույլ չեմ տվել առաջ գնալ ներկա պահին»,-գրել է նա թվիթերյան իր էջում:

The New York Times-ի հաղորդմամբ՝ Թրամփը հանձնարարել էր հարվածել Իրանին, սակայն վերջին պահին մտափոխվել էր:

Ուրբաթ Թրամփը Թվիթերում գրել էր, որ չեղարկել է Իրանի ուղղությամբ օդային հարվածները դրանց մեկնարկից 10 րոպե առաջ, քանի որ 150 մարդու սպանությունը ոչ համարժեք պատասխան կլիներ ամերիկյան խոցված դրոնի դիմաց: «Մենք շատ զայրացած էինք եւ պատրաստ էինք վրեժ լուծել անցած գիշեր երեք տարբեր նշանակետերից, երբ ես հարցրի, թե քանի մարդ կզոհվի: 150, պարոն նախագահ, պատասխանեց գեներալը: Հարվածից 10 րոպե առաջ ես հետ եմ կանգնեցրել նրան: Դա խոցված դրոնի դիմաց համարժեք պատասխան չէ»,-գրել է Թրամփը: