Ուկրաինայում մեկնարկել են Սբ. Մարիամ Աստվածածնի սրբապատկերի 228-րդ տարեդարձին նվիրված միջոցառումները

Ուկրաինայում մեկնարկել են Սբ. Մարիամ Աստվածածնի սրբապատկերի 228-րդ տարեդարձին նվիրված միջոցառումները, հաղորդում է AnalitikaUA.net-ը:

Հունիսի 22-ին Կիևում Ուկրաինայի հայերի միության և «Ուկրաինայի հայեր» քաղաքացիական հարթակի նախաձեռնությամբ հայ համայնքի հայտնի ներկայացուցիչներ հավաքվել են կլոր սեղանի շուրջ, որտեղ քննարկվել են կարևոր, հեռանկարային ծրագրեր:

Միջոցառմանը ներկա են եղել գիտնականներ, քաղաքագետներ, լրագրողներ, երաժիշտներ, հոգևորականներ և հասարակական գործիչներ:

Կլոր սեղանի մասնակցիները ողջունել են Ուկրաինայի հայ համայնքի ծրագրած միջոցառումները, նշվել են համատեղ քայլերը՝ Ուկրաինայի հայերի հարուստ մշակութային և պատմական ժառանգությունն ավելի հայտնի դարձնելու համար:

Մարիամ Աստվածածնի սրբապատկերը հանդիսանում է Ուկրաինայի հայերի հոգևոր ժառանգության ամենահայտնի մասունքներից մեկը: 1791 թվականի հունիսի 27-ին սրբապատկերն ու Կամենեց-Պոդոլսկում վերակառուցված եկեղեցին օծվել են, և արքեպիսկոպոս Յակով Թումանովիչի կարգադրությամբ նշվում է Հայ Աստվածամոր սրբապատկերի օրը:

2011 թվականին ուկրաինացի գիտնականներն առաջարկել են հունիսի 27-ը հայ-ուկրաինական բարեկամության օր հռչակել:

Ամեն տարի այդ օրն Ուկրաինայի տարբեր շրջաններում հայկական սփյուռքը թեմատիկ միջոցառումներ է անցկացնում: Տոնակատարություններն ավարտվում են հունիսի 28-ին:

Ինչպես հայտնի է, Ուկրաինայի հայերի միությունը Վիլեն Շատվորյանի ղեկավարությամբ դարձել է համաուկրաինական միակ կազմակերպությունը, որը միավորում է երկրում գործող բոլոր հայկական կազմակերպություններին: Ուկրաինայի հայերի միությունը հատուկ ուշադրություն է հատկացնում գիտության, կրթության, մշակույթի և սպորտի ոլորտներին: