The Washington Post. ԱՄՆ-ն Ասանժին արտահանձնելու պաշտոնական հարցում է ուղարկել

ԱՄՆ արդարադատության նախարարությունը Մեծ Բրիտանիայի իշխանություններին պաշտոնական հարցում է ուղարկել WikiLeaks-ի հիմնադիր Ջուլիան Ասանժին արտահանձնելու վերաբերյալ, հայտնում է The Washington Post-ը:

Նշվում է, որ այս քայլը քիչ հավանական է դարձնում Ասանժին այլ մեղադրանքների առաջադրումը:

Պարբերականի աղբյուրը, որը ԱՄՆ իշխանությունների ներկայացուցիչ է, հայտնել է, որ Մեծ Բրիտանիայի հետ ԱՄՆ պայմանավորվածության համաձայն՝ արտահանձնելու մասին հարցումը պետք է ուղարկվեր ապրիլի 11-ին Լոնդոնում Էկվադորի դեսպանատանը Ասանժի կալանավորումից հետո 60 օրվա ընթացքում:

Նույն պայմանավորվածության համաձայն՝ Միացյալ Նահանգներին արգելվում է Ասանժին որեւիցե այլ մեղադրանքի առաջադրումը՝ բացի այն մեղադրանքներից, որոնք նշվել են արտահանձնելու մասին հարցման մեջ:

Մեղադրական եզրակացության մեջ, որը կազմված է 18 կետից, դատախազներն Ասանժին մեղադրում են լրտեսության մասին օրենքը խախտելու եւ կառավարական համակարգիչները կոտրելու նպատակով համաձայնության գալու մեջ:

Ընդ որում՝ ԱՄՆ արդարադատության նախարարությունը WikiLeaks-ի հիմնադրի դեմ հետապնդում չի իրականացնում՝ կապված 2017 թվականին ԿՀՎ հաքերային գործիքների բացահայտման հետ, որ հայտնի է որպես «Vault 7», քանի որ, ըստ կառավարական պաշտոնյաների, դա մեծ վնաս կհասցնի ազգային անվտանգությանը:

Քննությունը շարունակվում է: Տեղեկությունների արտահոսքի մեղադրանքներ են առաջադրվել ԿՀՎ նախկին աշխատակից Ջոշուա Ադամ Շուլտին եւ ռազմական հետախուզության նախկին վերլուծաբան Չելսի Մենինգին, որը շարունակում է բանտում մնալ մեծ ժյուրիին ցուցմունք տալուց հրաժարվելու պատճառով: