«Արի պարի Քոչարի»․ աշխարհի տարբեր երկրներում հայերը պարում են քոչարի

«Արի պարի Քոչարի» նախագիծը առաջին համահայկական ֆլեշմոբն է իր տեսակի մեջ։ Պարի՛ր, նկարահանի՛ր եւ տեղադրի՛ր տեսագրությունը համացանցում՝ #AriPariQochari2019 հեշթեգով: Զարմացրո՛ւ, հիացրո՛ւ, ապրեցրո՛ւ քո պարով»։ Նախագծի հեղինակների այս կոչին միացել են աշխարհի հայաշատ երկրների բնակիչները։

«Արի պարի Քոչարի» նախագծի ֆեյսբուքյան էջում տեղադրվել են բազմաթիվ տեսանյութեր, որտեղ քոչարի են պարում Եգիպտոսում, Գերմանիայում, Բելգիայում, Շվեյցարիայում, Ֆրանսիայում, Ուզբեկստանում, Արգենտինայում, Ուրուգվայում եւ այլուր:

Ինչպես նշում է «Արի, պարի Քոչարի» նախագծի հեղինակ եւ համակարգող Սիրանուշ Խաչատրյանը, այս տարվա ծրագիրը նվիրված է Հովհ. Թումանյանի եւ Կոմիտասի ծննդյան 150-ամյակներին: «Հավատարիմ մնալով մեր առաքելությանը` աշխարհասփյուռ հայերին Քոչարու շուրջ համախմբելուն, այս տարի ընտրել ենք Կարնո քոչարին` որպես մասնակցության համար առաջնային պար։ Քչերը գիտեն, որ Կոմիտասը գրի է առել նաեւ պարեր, որոնցից մեկն էլ Կոմիտասի «Շորոր»-ն է: Առաջարկում ենք նաեւ պարել «Շորոր»-ը», - ասել է նա:

Նախաձեռնությունն առաջին անգամ անցկացվել է 2018 թվականի մայիսի 26-ին: Այն նվիրված էր Հայաստանի Առաջին Հանրապետության 100 եւ Էրեբունի-Երևանի հիմնադրման 2800-ամյակներին: Հայկական ավանդական «Քոչարին» ոչ միայն մեր մշակույթի այցեքարտերից մեկն է, այլեւ հայ ժողովրդի ինքնության, ինքնաարտահայտման մի մասնիկը, որ ապրում է յուրաքանչյուրի հոգում` անկախ բնակության վայրից ու տարածությունից: Սա մի փորձ էր՝ համախմբելու աշխարհի 6 մայրցամաքներում ապրող հայերին մեկ պարի շուրջ` ի նշան մեր ժողովրդի միասնության եւ մեր փառավոր հաղթանակների։