«Լրիվ տրվել է պետությանը, խաղալիք է դարձել». Լոքմագյոզյանն Աթեշյանի մասին

Թուրքիան այն պետությունն է, որը միշտ փորձում է հայկական համայնքն իր հսկողության տակ պահել, ինչը նորմալ է: Սակայն այլ հարց է, թե մենք ինչ ենք անում, մեր շահերն ինչպես ենք առաջ տանում: Այս մասին այսօր հայտարարեց թուրքագետ Տիրան Լոքմագյոզյանը:

Անդրադառնալով Պոլսո հայոց պատրիարքի ընտրությանը` Լոքմագյոզյանն ասաց, որ Մեսրոպ Մութաֆյան պատրիարքը երբ հիվանդացավ, Արամ Աթեշյանը դարձավ նրա տեղապահը, սակայն նա գիտեր, որ իր դիրքերը թույլ են, ուստի սկսեց հարաբերություններ ձևավորել իշխանության հետ: Այնպես, ինչպես Աթեշյանն է անում, լրիվ տրվել է պետությանը, խաղալիք է դարձել, սա ծայրահեղ մոտեցում է:

Պոլսո պատրիարքի երկու թեկնածու կա այսօր, որոնցից մեկն Արամ Աթեշյանն է, մյուսը` Սահակ Մաշալյանը: Վերջինս, ըստ Լոքմագյոզյանի, անհասկանալի խաղ է խաղում: Մի կողմից՝ նա չի ընդդիմանում Արամ Աթեշյանի հակահայկական քայլերին, մյուս կողմից՝ նրա դեմ հայտարարություններ է անում, որոնք խարխլում են համայնքային անդորրը:

Լոքմագյոզյանի խոսքով` Ստամբուլի հայկական համայնքի և պատրիարքարանի ակտիվ գործունեության համար անհրաժեշտ է պատրիարքության նոր կանոնադրություն, ոչ թե օսմանյան ժամանակներից մնացած կանոնադրությունը, որը հնացած է և ոչ կենսունակ:

Տիրան Լոքմագյոզյանն ասաց, որ Պոլսո պատրիարքի ընտրության հարցում ամենամեծ հնարավորությունն ունի Արամ Աթեշյանը: