ԱՄՆ օդուժն առաջին անգամ մարտական պայմաններում կիրառել է F-35 ինքնաթիռներից մեկը

Միացյալ Նահանգների ռազմաօդային ուժերի F-35A կործանիչ ինքնաթիռը, որ
F-35 ընտանիքի տարբերակներից մեկն է, առաջին անգամ կիրառվել է մարտի
դաշտում՝ մասնակցելով Իրաքում ամերիկյան զինված ուժերի մարտական
գործողություններին։ Այս մասին հայտնել են ԱՄՆ օդուժի կենտրոնական
հրամանատարությունից։

Ապրիլի 30-ին այս տեսակի երկու բազմաֆունկցիոնալ ինքնաթիռները օդից
հարվածներ են հասցրել Իրաքում գործող «Իսլամական պետություն» ահաբեկչական
խմբավորման օգտագործած թունելներին ու զենքի թաքստոցներին։ Հարձակման
արդյունքների մասին զինվորականները տվյալներ չեն հրապարակել։

F-35 ընտանիքի մյուս ինքնաթիռներն արդեն իսկ կիրառվել են մարտական
գործողություններում, այդ թվում՝ ԱՄՆ և Իսրայելի զինված ուժերի կազմում։

Դրանք նախատեսված են օդում հակառակորդի ինքնաթիռների դեմ պայքարելու, նրանց
հաղթելու, ապա նաև ցամաքային զորքերին օժանդակելու համար։