Ս-400 գնելու Թուրքիայի որոշման վերաբերյալ ԱՄՆ դիրքորոշումը պայմանավորված է տնտեսական շահերով. ՌԴ ԱԳՆ

Մոսկվան ոչ մի զարմանալի բան չի տեսնում ռուսական Ս-400 համալիրները գնելու Թուրքիայի որոշման վերաբերյալ ԱՄՆ հայտարարությունների մեջ, Վաշինգտոնի քաղաքականության մեջ առկա է «ցայտուն արտահայտված» տնտեսական շահը, լրագրողներին ասել է ՌԴ ԱԳ փոխնախարար Ալեքսանդր Գրուշկոն, փոխանցում է «ՌԻԱ Նովոստի»-ն:

«Լավ հայտնի է, որ ԱՄՆ-ն այսօր չի վարանում բոլոր հարցերում դաշնակիցների վրա ճնշում գործադրելու միջոցների ընտրության մեջ: Որ ոլորտն էլ վերցնենք, ումից եւ ինչ գազ գնել, ում հետ բարեկամանալ, ում հետ՝ ոչ, ում դեմ պատժամիջոցներ սահմանել, ում օգտին եւ ինչպես քվեարկել եւ որ երկրներում, որ ռեժիմներն են ժողովրդավարական, որոնք՝ ոչ, որոնց պետք է լքեն: Այստեղ ամերիկացիները չեն վարանում ո՛չ միջոցների, ո՛չ արտահայտությունների ընտրության մեջ, ուստի այն ճնշումը, որը ԱՄՆ-ն գործադրում է Թուրքիայի վրա, այս իմաստով ամենեւին զարմանալի չէ»,- հայտարարել է Գրուշկոն:

Նրա խոսքով՝ այստեղ առկա է ցայտուն արտահայտված տնտեսական շահը: «ԱՄՆ-ն չափազանց հետաքրքրված է այն հարցում, որ Թուրքիան, ինչպես եւ շատ այլ դաշնակիցներ, գնեն հատկապես ամերիկյան զենքը, հենց դրա, այլ ոչ թե ուրիշ պատճառով են նրանք պահանջում եվրոպացիների ռազմական բյուջեի մինչեւ 2 տոկոսով ավելացումը»,- հավելել է Գրուշկոն:

Եթե ԱՄՆ այս պահանջը կատարվի, ապա ՆԱՏՕ-ի բյուջեն կկազմի «տիեզերական գումար»՝ 400 մլրդ դոլար, որից 100-ը պետք ծախսվի ամերիկյան սպառազինություն գնելու համար, նշել է Գրուշկոն:

Նախօրեին Մայք Փենսը Անկարային կրկին կոչ էր արել հրաժարվել ռուսական Ս-400-ի գնումից: «Թուրքիան պետք է ընտրություն կատարի: Ցանկանո՞ւմ է կարեւոր գործընկեր մնալ պատմության մեջ ամենահաջողված ռազմական դաշինքում, թե՞ ցանկանում է վտանգել այդ գործընկերության անվտանգությունը՝ ընդունելով այդպիսի չկշռադատված որոշումներ, որոնք մեր դաշինքը սասանում են»,- հայտարարել էր Փենսը Վաշինգտոնում տեղի ունեցած ՆԱՏՕ-ի միջոցառման ժամանակ: