«Հայաստանում կարկտապաշտպան ցանցերի արտադրության ոլորտում մրցակցություն կա». նոր արտոնություն՝ «ՎԱԲԱ» ընկերությանը

Կառավարությունն այսօրվա՝ մարտի 29-ի նիստում գերակա ոլորտում իրականացվող ներդրումային ծրագրի շրջանակներում մաքսային արտոնություն տրամադրեց «ՎԱԲԱ» սահմանափակ պատասխանատվությամբ ընկերությանը։

Հարցը ներկայացրեց Տնտեսական զարգացման եւ ներդրումների նախարար Տիգրան Խաչատրյանը՝ նշելով, որ ներդրումային ծրագրի շրջանակներում ՀՀ Լոռու մարզի Վանաձոր քաղաքում «ՎԱԲԱ» ՍՊ ընկերությունը նախատեսում է կազմակերպել գյուղատնտեսական նշանակության հակակարկտային ցանցերի եւ կարկտապաշտպան ցանցերի ներդրման ողջ համակարգի արտադրություն։

«ՎԱԲԱ» սահմանափակ պատասխանատվությամբ ընկերությանը` ՀՀ կառավարության 2018 թվականի հունիսի 21-ի N703-Ա որոշմամբ թույլատրվել է ներդրումային ծրագրի շրջանակներում ներմուծված սարքավորումների, հումքերի եւ նյութերի ԱԱՀ-ն հետաձգել 3 տարի ժամկետով: Մեկնարկած ծրագրի շրջանակներում ընկերությունը նպատակադրված էր կատարել շուրջ 2,25 մլրդ դրամի ընդհանուր ներդրում, որը պետք էր իրականացներ մի քանի փուլերով։

Ներկա պահին ընկերությունն արդեն իսկ կատարել է ամբողջ 2,25 մլրդ դրամի ներդրումը եւ ներդրումային ծրագրի արդյունքում ստեղծել թվով 25 աշխատատեղ։

Առաջին փուլով ընկերությունը արտոնություն էր ստացել ներմուծվող ապրանքների մասով 102,9 մլն դրամի չափով, որն էլ ցանկով հաստատված ամբողջ ներմուծումը կատարվել է արդեն, երկրորդ փուլով նախատեսում էր ներմուծել եւս 126,2 մլն դրամի չափով ապրանքներ, որի ներմուծումն էլ արդեն իսկ կատարվել է, իսկ այժմ ընկերության մոտ երրորդ եւ վերջին փուլի շրջանակներում նախատեսվում է ապրանքներ ներմուծել շուրջ 9 մլրդ դրամի չափով։

Հաշվի առնելով այն հանգամանքը, որ նախատեսվող սարքավորումների եւ կառուցվածքների ներմուծումը պայմանավորված է կատարվելիք աշխատանքների լայնածավալությամբ ու բարդությամբ, սարքավորումների մեծ մասի ԱՏԳ ԱԱ ծածկագրերի հստակեցմամբ՝ նշված ներդրումային ծրագրի շրջանակներում սարքավորումների եւ կառուցվածքների ներմուծումն իրականացվելու է փուլ առ փուլ։

Ներկայումս, ընկերությունը կնքել է հերթական պայմանագրերը, ուստի առաջացել է ներմուծվող ապրանքների ցանկի փոփոխման եւ լրացման անհրաժեշտություն: Ներդրումային ծրագրի իրագործման արդյունքում կստեղծվի մոտ 24 աշխատատեղ` միջին աշխատավարձը կազմելով 2018-2020 թվականները 320 հազար դրամ:

Փոխվարչապետ Տիգրան Ավինյանը նշեց, որ արդեն Հայաստանում արտադրվում են կարկտապաշտպան ցանցեր: «Ենթադրաբար, դրանց գործարկումը եւ ինտենսիվ այգիների շրջանակներում շատ ավելի մատչելի պետք է լինի գուղացիական տնտեսությունների համար: Ես տեղյակ եմ, որ կա նաեւ այլ ընկերություն եւ մրցակցություն կա դաշտում»,-ասաց նա: