Ամյանը լարված է. քառօրյայի մասնակցի մայրը պահանջում է խոստացված բնակարանը

Ապրիլյան պատերազմի մասնակից Ալբերտ Վարպետյանի մայրը՝ Սիրանույշ Տելյանը, սպասում է վարչապետ Նիկոլ Փաշինյանին մարտի 23–ին փոխանցած նամակի պատասխանին՝ հույսով, որ արձագանքը դրական կլինի։

Տիկին Տելյանը պատմեց, որ Ալբերտն ամուսնացել է եւ շուտով երեխա կունենան։ Լուրն ուրախացրել է ընտանիքի անդամներին, միևնույն ժամանակ, մտահոգել՝ բնակարանը, որտեղ ընտանիքն ապրում է շատ, փոքր է։ 23–ամյա Ալբերտը հոր, մոր եւ կնոջ հետ բնակվում է Վարդաշենի հանրակացարաններից մեկում: Զորացրվելուց մեկ ամիս անց զինկոմիսարիատից զանգել են Ալբերտին, ընտանիքի հետ միասին հրավիրել իրենց մոտ, որ շնորհակալություն հայտնեն: Տիկին Սիրանույշի խոսքով՝ այդ հանդիպմանը ներկա են եղել նաեւ Էրեբունի վարչական շրջանի այն ժամանակվա ղեկավար Դավիթ Գրիգորյանը եւ քաղաքապետի նախկին տեղակալ Դավիթ Օհանյանը:

«Դավիթ Օհանյանն ինքն անձամբ երեխեքին ասեց՝ ապրեք, երեխեք ջան, այս ընտանիքները, ով ինչ խնդիր ունի, մենք միշտ իրենց կողքին ենք: Ես էլ մոտիկացա, ասացի, որ ապրում ենք հանրակացարանում, երեխուն պիտի նշանենք, տեղ չունենք, 23 քառակուսիում ենք ապրում։ Խնդրեցի, որ եթե հնարավոր է, հանրակացարանում մի սենյակ երեխուն տրամադրեն: Ահագին ժամանակ անցավ, ես եղել եմ պարոն Ամյանի (խմբ. Երևանի քաղաքապետարանի աշխատակազմի անշարժ գույքի կառավարման վարչության պետ) մոտ, ընդունելության ժամանակ պարոն Ամյանը Արթուր Կարապետյանի (խմբ. Երևանի քաղաքապետարանի աշխատակազմի քարտուղարի տեղակալ) ներկայությամբ ինձ ասել է՝ եթե ազատ սենյակ լինի, մենք կտրամադրենք երեխուն, այնինչ հիմա ասում է՝ ես նման բան չեմ ասել»,– ասաց նա:

Նրա խոսքով՝ Դավիթ Գրիգորյանի կառավարման ժամանակ հարցը կարծես լուծման փուլին էր մոտենում, երբ գործին միջամտել է շենքի լիազորը՝ Աիդա Դոխոյանը: Սկզբում նա ներկայացել է որպես սրտացավ մեկը, բայց վերջում գումար է պահանջել, չստանալով գումարը՝ սկսել է խնդիրներ առաջացնել։

«Մի օր ԺԷԿ–ի պետը՝ Շուշանիկը, զանգում է Աիդա Դոխոյանին, թե այդ երեխան ո՞վ է ծառայած, մեզ ասում են, որ շենքում ազատ սենյակ կա, պետք է նրան տրամադրեն, Աիդան էլ, առիթից օգտվելով ինձ ասում է՝ ասողը ես եմ, եթե 1500 դոլար կտաս, մի սենյակը՝ ինձ, մի սենյակը՝ քեզ»,- ասաց տիկին Սիրանույշը։

Նրա խոսքով՝ ինքը դիմել է նաեւ ներկայիս Էրեբունի վարչական շրջանի ղեկավար Արման Աբրահամյանին, պատասխանել են, որ միջնորդագիր են ուղարկել քաղաքապետարան, եւ որ պետք է ավագանին որոշի այդ հարցը։

Մարտի 23–ի համապետական շաբաթօրյակի ժամանակ տիկին Սիրանույշը փողոցում հանդիպել է քաղաքապետ Հայկ Մարությանին եւ ներկայացրել խնդիրը։

«Ասում եմ՝ կասե՞ք՝ ինչն է պատճառը, որ իմ երեխու գործը ավագանու նիստում չեն ներկայացնում։ «Լույս» խմբակցությանը դիմել եմ, «Բարգավաճին» դիմել եմ, առաջինը «Իմ քայլին» եմ դիմել։ Ով մտնում ա Ամյանի մոտ, դուրս ա գալիս, ասում ա՝ Ամյանը լարված է Ձեր երեխու գործի դեմ, որովհետեւ ես բողոքել եմ վերահսկողություն»,– ասաց տիկին Սիրանույշը։

Նրա խոսքով՝ քաղաքապետարանում ինքը տեղեկացել է, որ նույն սենյակի համար դիմում է ներկայացրել նաեւ շենքի լիազորը։ Ասում է, որ պահպանվել են անգամ ձայնագրությունները, որտեղ Աիդա Դոխոյանը խոսք է տալիս, որ կներկայացնի խնդիրը քաղաքապետարանում։

Սիրանույշն ամեն վայրկյան հույսով սպասում է, որ վերջապես «մի անկյուն» կհատկացնեն Ալբերտին, եւ նորաստեղծ ընտանիքը ստիպված չի լինի մտածել, թե որտեղ տեղավորեն օրորոցը։

Ավելի վաղ տեղեկացրել էինք, որ մարտի 23-ին, շաբաթօրյակի ժամանակ ապրիլյան քառօրյայի մասնակցի մայրը դիմել էր Երեւանի քաղաքապետ Հայկ Մարությանին, ասելով, որ իր տղային հանրակացարանում սենյակ տրամադրելու հարցը դնեն ավագանու նիստի, ինչին քաղաքապետը պատասխանել էր, որ դա ավագանին է որոշում։