ՊՊԾ գնդի գրավման գործով դատաքննության ժամանակ տուժողները ցուցմունք են տվել
ՊՊԾ գնդի գրավման գործով 10 ամբստանյալների` Պավել Մանուկյանի, Վարուժան Ավետիսյանի և մյուսների գործով դատաքննության ժամանակ տուժողները ցուցմունք տվեցին: Տուժող Սարգիս Գրիգորյանը պատմեց, որ գնդի գրավման ժամանակ իր մեքենան գտնվել է գնդի տարածքում և հրազենից վնաս է կրել: Իր հետ կապված ուրիշ որևէ խնդիր չի եղել, այդ պատճառով ինքն իրեն տուժող չի համարում, թեև իրավաբանորեն համարվում է տուժող: Տեղյակ չէ, թե կրակոցն ում կողմից է արձակվել: Իրեն հասցված գույքային վնասի համար դատարանից ոչ մի պահանջ չունի:
Մյուս տուժողը`Գեղամ Խաչատրանն, այժմ չի աշխատում, սակայն գնդի գրավման օրերին աշխատել է ՊՊԾ գնդում որպես գումարտակի հրամանատար: Գիշերը 02:10-ի սահմաններում դուրս է եկել գնդից` քաղաքում ծառայություն կատարելու համար, զանգել են, ասել, որ գունդը գրավված է: «Գնացել եմ, տեսել`բազմաթիվ ոստիկաններ: Իմ կաբինետում նկատեցի չհրկիզվող պահարանը, որը կոտրված էր, այնտեղ ես ունեի 3500 դոլար, որը ստացվել էր մեքենայի վաճառքից, 500 եվրո և 340 000 դրամ: Հետո մոտ մեկ միլիոն դրամ հայտնաբերվել է լազերային հրաձգարանում` չհրկիզվող պահարանի կապույտ պայուսակի մեջ»:
Տուժողը պատմել է նաև գնդի գրավման ժամանակ զոհված ոստիկանների մասին:
«Մեր գնդի հրամանատարի մահվան փաստն ու Յուրի Տեփանոսյանի մահվան մասին իմացանք տղաներից: Գագիկ Մկրտչյանը վիրավորված էր. տեսել եմ արյունահոսությունը: Մնացածը` չէ: Իմացել եմ, որ կրակոցից մահացել է»: Զարուհի Փոստանջյանի այն հարցին, թե մոտեցա՞վ արդյոք վիրավոր ոստիկանին, տուժողը պատասխանեց:
«Կարիք չկար հարյուր հոգով մոտենալ էդ տղուն: Շտապօգնությունն իր գործն էր անում»:
Տուժող Գեղամ Խաչատրյանը նաև ասաց, որ չի հասցրել գնալ և տեսնել Գագիկ Մկրտչյանին, քանի որ ծառայություն էր իրականացնում: Զարուհի Փոստանջյանը շարունակում էր հարցեր ուղղել տուժողին, թե ինչու՞ չի գնացել վիրավոր Գագիկ Մկրտչյանին տեսության, տուժողը պատասխանեց, որ ծառայություն է իրականացրել, այդ պատճառով չի կարողացել գնալ: Փոստանջյանը շարունակում էր հարցեր տալ նույն ուղղվածությամբ, որոնք, դատարանի գնահատմամբ, հանդիմանական բնույթ էին կրում: Հարցերը հանվեցին: Արմեն Բիլյանը հարցրեց, թե արդյոք Գեղամ Խաչատրյանը հիշու՞մ է, թե ինչպես է մայրաքաղաքի փողոցներում ծեծել ՀՀ քաղաքացիներին: Տուժողն էլ իր հերթին հարցրեց.
«Իսկ հիշու՞մ եք, որ ձեր ճակատներին արյունով գրված էր Յուրիկ, Գագիկ և Արթուր»:
Հիշեցնենք, որ Գագիկ Մկրտչյանը, Յուրի Տեփանոսյանն ու Արթուր Վանոյանը զոհվել էին գնդի գրավման ժամանակ: