Մաղթում եմ գիտակից ու շնորհակալ հանդիսատես. Ղարիբյանը շնորհավորել է Թատրոնի միջազգային օրվա առիթով
ՀՀ մշակույթի նախարարի պարտականությունները կատարող Նազենի Ղարիբյանը շնորհավորել է թատերարվեստի գործիչներին ու թատերասերներին Թատրոնի միջազգային օրվա առիթով: Այս մասին տեղեկանում ենք նախարարության պաշտոնական կայքից:
«Ամեն տարի մարտի 27-ին, մենք ևս մեկ հնարավորություն ունենք գնահատելու, վերարժևորելու թատրոնի ոլորտի նվիրյալների անասելի աշխատանքը, հպարտանալու՝ մեր թատերարվեստի ձեռքբերումներով: Թատրոնը մշակութային օջախ է, որտեղ արժևորվում են գեղեցիկն ու իրականը, կարևորվում է յուրաքանչյուր ժեստ, դիմախաղ ու խոսք: Համարվում է, որ թատրոնը նույնքան հին է, որքան քաղաքակրթության պատմությունը, այն իր ներսում խտացնում է ոչ միայն հազարամյակներով թրծված խաղի ծիսական ոգին, այլև արվեստի տարբեր դրսևորումները՝ գրավելով հանդիսատեսին իր ազդեցիկ անմիջականությամբ»,-ասված է հաղորդագրության մեջ:
Նշված է, որ ՀՀ մշակույթի նախարարությունն արժևորում է հայ բեմի ավանդույթների պահպանումը, սերնդեսերունդ փոխանցումն ու միևնույն ժամանակ նորարարություններից չխուսափելու միտումը:
«Հայ թատրոնի հարգարժան ներկայացուցիչներ, ևս մեկ անգամ շնորհավորում եմ մասնագիտական տոնի առիթով՝ մաղթելով գիտակից ու շնորհակալ հանդիսատես»,-գրված է շնորհավորական տեքստում: