Ժողովուրդը նստեց գծերին, որ տեսնեն, այս քայլն էլ կա. զարթոնքցիները փակել են երկաթգիծը

Արմավիրի մարզի Զարթոնք համայնքի բնակիչները այսօր՝ մարտի 26-ին, փակել են Գյումրի-Երևան երկաթգիծը՝ պահանջելով 23 տարվա գյուղապետ Պարույր Սարգսյանի հրաժարականը:

«Նպատակը այն էր, որ ուզում էինք ցույց տալ կառավարությանը, որ այս
քայլն էլ կա: Եկել էր երկաթգծի վարչության պետը, ինքը մեզ ասաց, որ իրենք
տեղյակ են գյուղի իրավիճակին, ուղղակի իրենք չեն ուզում փակուղի լինի, դա
իրենց ապրելու միջոցն է: Մոտ 200 մարդը նստեց գծերին, հետո, դե գնացքում
մարդիկ կային, բացեցինք»,- պատմեց համայնքի բնակիչ Համլետ Աբովյանը:

Համայնքի գյուղապետ Պարույր Սարգսյանը ասաց, որ ինքն էլ է ստորագրահավաք արել. «Հավաքել եմ 700-800 ձայն, դե թող գնան ու մտածեն՝ ումն է ավելի իրականը, ու ավելին՝
կներկայացնեմ սա մարզպետարան»,- ասաց նա:

Գյուղապետի խոսքով՝ ինքը տեղյակ է բնակիչների գործողություններին և դրա
մասին զեկուցել է Արմավիրի փոխմարզպետին: Ինչ վերաբերում է երկաթգծի
փակմանը՝ գյուղապետը ասաց հետևյալը. «Նախ սկսենք այնտեղից, որ  200 բնակիչ
չկար: 25-30-ը եղել են մեր համայնքի բնակիչ, բայց մյուսներն այլ համայնքերի
բնակիչներ էին: Իմ համայնքի բնակիչներին շատ լավ ճանաչում եմ»:

Համայնքի բնակիչների խոսքով՝ գյուղապետի ստորագրահավաքի հավաքած թիվը
նման է հեքիաթի. «Ուղղակի ծիծաղելի է, որ նա կարող է հավաքել 800 ձայն. նա
ամենաշատը 170 ստորագրություն կարողանա հավաքած լինի»,- ասաց Համլետ
Աբովյանը:

Ցուցարարները հանդիպել են մարզայինի վարչության պետի հետ, և տեղեկացել,
որ կհարուցվի քրեական գործ՝ երկու  հոդվածներով՝ փողերի լվացում և
պաշտոնական դիրքի չարաշահում:

Հիշեցնենք, որ Զարթոնք գյուղում արդեն երկու շաբաթ է՝ ցույցերը չեն
դադարում։ Ցուցարարները պահանջում են 23 տարվա գյուղապետ Պարույր Սարգսյանի
հրաժարականը, նրան մեղադրելով մի շարք անօրինականությունների մեջ։