Կաշխատեն այն գրավատները, որոնց կապիտալը 100 միլիոն դրամից ավելի է․ քաղաքացիները բողոքում են

Այսօր վաղ առավոտից Կառավարության շենքի դիմաց մի խումբ քաղաքացիներ բողոքի ակցիա են անցկացնում։

Նրանք պահանջում են վերախմբագրել «Պետական տուրքի մասին» ՀՀ օրենքում սպասվող փոփոխությունները, ըստ որոնց՝ 60 անգամ, այն է՝ 6000 %-ով ավելացվելու է նշյալ ոլորտների պետական տուրքը․ գրավատների համար ներկայիս 100 000 դրամի փոխարեն սահմանվելու է 6 000 000 (վեց միլիոն), փոխանակման կետերի համար՝ 50 000-ի փոխարեն 3 000 000 (երեք միլիոն) դրամ պետական տուրք:

«Կառավարության հիմնավորումների մեջ նշված է եղել, որ 2%-ով շահութահարկի նվազեցում է տեղի ունեցել և դա կարելի է լրացնել պետական տուրքի բարձրացմամբ: Իրենց հիմնավորման հենց հաջորդ նախադասությունում գրած է, որ նրանք չեն հանդիսանում շահառու: Իրենք իրենց հիմնավորման մեջ ուրիշ թիվ չունեն: Կաշխատեն այն գրավատները, որոնց կապիտալը 100 միլիոն դրամից ավելի է, բայց մնացածը կփակվեն»,- ասաց քաղաքացիներից մեկը:

Մեկ այլ քաղաքացի նշեց, որ շահութահարկն իջեցնելու դեպքում չի նշանակում, որ մեկ այլ տեղից պետք է քաղաքացիներին «հարվածել»: