Այսօր «Դեղին բաճկոնները» մտադիր են նստացույց իրականացնել Փարիզում

Ֆրանսիական «դեղին անթև բաճկոններ» շարժման մասնակիցները 17-րդ «շաբաթօրյա ցույցի» շրջանակներում երթ են կազմակերպել, որը Հաղթանակի կամարից ընթանում է դեպի Փարիզի հինգերորդ շրջանի կողմը:
Ինչպես հայտնում է Interfax.ru-ն, երթը պետք է ավարտվի Էյֆելյան աշտարակի մոտակայքում՝ Մարսյան դաշտում անցկացվելիք նստացույցով (sit-in):

Ֆրանսիական լրատվամիջոցների հաղորդմամբ՝ «դեղին բաճկոնները» պատրաստվում են իրենց գլխավոր ազգային օրվա՝ մարտի 16-ի միջոցառումներին, երբ նախատեսվում է ավարտին հասցնել նախագահ Էմանուել Մակրոնի նախաձեռնությամբ անցկացվող համազգային քննարկումները, որոնց անցկացման առաջարկով վերջինս հանդես էր եկել անցյալ տարվա նոյեմբերին բողոքի հզոր ալիքի բռնկումից հետո:

Հիշեցնենք, որ ֆրանսիացիները շարունակում են իրենց բողոքի ձայնը բարձրացնել մոտ 4 ամսի: Անցյալ շաբաթ երկրի ողջ տարածքում իրականացված գործողություններին 39 300 մարդ է մասնակցել, որոնցից 4000-ը՝ մայրաքաղաքում:

Այսօր ցույցեր են հայտարարվել նաև Լիոնում, Բեզանսոնում, Ստրասբուրգում, Լիլում, Բորդոյում, Մոնպելյեում, Ավինյոնում և այլ քաղաքներում: