70 կՎտ հզորության արևային ֆոտովոլտային կայանի գործարկում Ազատան գյուղում. (լուսանկարներ)

5000-ից ավելի բնակիչ ունեցող Ազատան գյուղը մարզի այն համայնքներից է, որն ամբողջությամբ գազաֆիկացված է և տնտեսությունների մեծ մասն օգտվում է կապույտ վառելիքից, իսկ այլընտրանքային էներգիայի աղբյուրներից օգտվելը դարձել է ժամանակի պահանջը:

Արևային ֆոտովոլտային կայանի կառուցման ծրագիրը գյուղ էր հասել 2018-ի ամռանը: Մեկ տարի չանցած՝ գյուղապետարանը, դպրոցն ու մանկապարտեզն արդեն օգտվում են արևային էներգիայից: 70 կՎտ/ժամ հզորության կայանը նպաստելու է գյուղի կարիքների ճիշտ օգտագործմանը:

«Վերականգնվող էներգիան լուրջ դեր է խաղում ցանկացած երկրի էներգետիկ անվտանգության ընդհանուր ռազմավարության գործում: Այս նախագծի իրականացումը անչափ կարևոր է ոչ միայն համայնքի, այլև երկրի համար: Հույս ունենք, որ Ազատանը օրինակ կծառայի նաև այլ համայնքներին ու կնպաստի արևային էներգիայի կիրառմանը»,- ասել է ՀՀ-ում Ճապոնիայի արտակարգ և լիազոր դեսպան Ջուն Յամադան։

Արևային էներգիայի օգտագործումը թույլ կտա նվազեցնել էներգետիկ այն ծախսերը, որոնք մինչ այդ կատարել են գյուղապետարանը, դպրոցն ու մանկապարտեզը: Գյուղապետարանի հաշվարկները ցույց են տալիս, որ այդ խնայողությունները կարող են հասնել տարեկան 2 մլն դրամի:

70 կՎտ/ժամ հզորության կայանը հնարավորություն ունի տարեկան 100 կՎտ/ժամ էլեկտրաէներգիա արտադրել, ամբողջ հզորությամբ գործարկել նախատեսում են հետագայում: Արևային կայանների կիրառումով ոչ միայն տնտեսումների, նաև բնապահպանական խնդիրներն են լուծվում ։

Առայժմ արևային էներգիան հասնում է գյուղի դպրոցին, մանկապարտեզին ու գյուղապետարանին: Կայանն իր ունեցած հզորություններն ամողջությամբ օգտագործելու դեպքում էժան էներգիայից կարող են օգտվել նաև տնտեսությունները: Ծրագիրը Ազատան գյուղում է ներդրվել համայնքի ցանկությամբ և 15 տոկոսի չափով համաֆինանսավորման հնարավորության արդյունքում: Արևային ֆոտովոլտային կայանով արդեն հետաքրքված են հարևան գյուղերը:

Նոր Կյանքի գյուղապետը այսպիսի մի կայան էլ իրենց գյուղում կառուցելու ծրագիր է ներկայացրել կառավարություն: Գյուղապետարանը պատրաստ է համաֆինանսավորում կատարել, մնում է ֆինանսավորող մյուս կողմի համաձայնությանը հասնել: Ազատանի գյուղապետարանն արևային ֆոտովոլտային կայանի արտադրած հոսանքը վաճառելու է նաև Հայաստանի էլցանցերին, 1 կՎտ-ի արժեքն էլ հաշվարկվել է 22.5 դրամով: Էլեկտրաէներգիայի վաճառքից ստացած եկամուտն էլ կծախսեն համայնքի այլ կարիքները հոգալու համար: