Այսօր «քեֆ անող» և «փող բաժանող» «նավթի արքա» Ալեքսանդր Մանթաշյանցի ծննդյան օրն է
Այսօր նշանավոր գործարար և բարեգործ Ալեքսանդր Մանթաշյանցի ծննդյան օր է: Նա ծնվել է 1842 թվականին, Թիֆլիսում: Համարվել է իր ժամանակների ամենահարուստ մարդկանցից մեկը, քանի որ զբաղվել է նավթի արդյունահանմամբ: 1899 թվականին Մանթաշյանցը հիմնադրել է «Ալեքսանդր Մանթաշև և Կո» ընկերությունը, որը 20-րդ դարի սկզբին արդյունահանում էր Բաքվի նավթի կեսից ավելին։ Ֆինանսավորել է Բաքու-Բաթում նավթատարի շինարարությունը:
Իր առևտրային գործունեությունն Ալեքսանդր Մանթաշյանցը զուգակցում էր հասարակական և բարեգործական գործունեության հետ։ Մինչև 1895 թվականը եղել է Թիֆլիսի բարեգործական ընկերության փոխնախագահը, այնուհետև ցմահ դարձել նրա պատվավոր նախագահը։ Նա էր հովանավորում Կովկասի ամենախոշոր որբանոցը, նրա միջոցներով շենքեր և հայկական եկեղեցիներ են կառուցվել Թիֆլիսում, Երևանում, Բաքվում, Սանկտ Պետերբուրգում և Փարիզում: Փարիզի կենտրոնում գտնվող հայկական Սուրբ Հովհաննես Մկրտիչ եկեղեցին ևս կառուցվել է Ալեքսանդր Մանթաշյանցի շնորհիվ։
Երբ ցարական կառավարությունը որոշում արձակեց հայկական եկեղեցական ունեցվածքի առգրավման մասին՝ դրանով իսկ զրկելով հայկական դպրոցները, գիմնազիաները և մշակութային-լուսավորական մյուս օջախները նյութական աջակցությունից, Մանթաշյանցը ֆինանսավորեց Թիֆլիսի Ներսիսյան հոգևոր ճեմարանի նոր շենքի կառուցումը։ Նրա նվիրական իղձն էր խոշոր նվիրաբերում կատարել Էջմիածնին։ Նրա առաջարկով կազմվում է նոր վեհարանի նախագիծ՝ ընդարձակ սրահներով և ընդունարաններով։ Այդ աշխատանքների համար Մանթաշյանցը տրամադրում է 250.000 ռուբլի։
Հաճախակի լինելով Փարիզում՝ որոշում է այնտեղ հայկական եկեղեցի կառուցել: Դրա համար 450.000 ֆրանկով մի տարածություն է գնում Փարիզի կենտրոնում։ Այնուհետև եկեղեցու շինարարության համար տրամադրում է 1.540.000 ֆրանկ, որը կառուցվելուց հետո նվիրաբերում է հայ գաղութին՝ լրացուցիչ վճարելով 120.000 ֆրանկ նոտարական ծախս։
Ալեքսանդր Մանթաշյանը եղել է հայ մշակույթի, գիտության, արվեստի և գրականության մեծ նվիրյալ և հովանավոր։ Իմանալով, որ հայ մեծ կոմպոզիտոր Կոմիտասը սեփական դաշնամուր չունի, նա կարգադրել է, որպեսզի Գերմանիայից նրա համար բերվի այդ երաժշտական գործիքը։
2017 թվականից մարտի 3-ը Հայաստանում նշվում է որպես Գործարարի օր: Արդյունաբերողների ու գործարարների միության անդամներն այսօր նախագահի՝ Արսեն Ղազարյանի հետ այց են կատարել մայրաքաղաքի կենտրոնում տեղադրված «նավթի արքայի» հուշարձան և ծաղիկներ դրել: Օգտագործելով առիթը՝ Արսեն Ղազարյանը խոսել է գործարարների խնդիրների ու վերջին շրջանում Հայաստանում տնտեսական հեղափոխության շնորհիվ բացված հնարավորությունների մասին:
«Ունենք հավասար մրցակցային դաշտ, ունենք օրինականության բարձր մակարդակ, ունենք կոռուպցիայի և կաշառակերության կտրուկ նվազում, այսինքն՝ շուկա, որտեղ միայն մրցակցելով կկարողանանք զարգանալ, և այդ ազատությունն է տնտեսական հեղափոխության առաջին քայլը»,- ասել է Հայաստանի գործարարների ու արդյունաբերողների միության նախագահ Արսեն Ղազարյանը: