«Այրարատ» կինոթատրոնն ու «Զվարթնոց» օդանավակայանի հին մասնաշենքը՝ ՀՀ պատմության և մշակույթի հուշարձանների ցուցակում

E-draft իրավական ակտերի նախագծերի հրապարակման միասնական կայքում հրապարակվել է «Հայաստանի Հանրապետության կառավարության 2004 թ.հոկտեմբերի 7-ի N 1616-Ն որոշման մեջ լրացումներ կատարելու մասին» նախագիծը: Այն հեղինակել է Մշակույթի նախարարությունը:

Նախագծում նշված է, որ համաձայն «ՀՀ պատմության և մշակույթի անշարժ հուշարձանների ու պատմական միջավայրի պահպանության և օգտագործման մասին» ՀՀ օրենքի 14-րդ հոդվածի և ղեկավարվելով «Նորմատիվ իրավական ակտերի մասին» ՀՀ
օրենքի 33-րդ հոդվածի 2-րդ մասով և 34-րդ հոդվածի 1-ին մասով՝ ՀՀ կառավարությունը որոշում է.

ՀՀ կառավարության 2004 թվականի հոկտեմբերի 7-ի «ՀՀ Երևան քաղաքի պատմության և մշակույթի անշարժ հուշարձանների պետական ցուցակը հաստատելու մասին» N 1616-Ն որոշման N 1 հավելվածում կատարել լրացումներ:

Վերոնշյալ ցուցակը հարստանում է հետևյալ օբյեկտներով՝

Երևանի մետրոպոլիտենի «Հանրապետության հրապարակ» կայարան (1981 թ., ճարտ.` Ջ. Թորոսյան, Մ. Մինասյան, ՀԽՍՀ պետական մրցանակ՝ 1983 թ., սեփ.՝ «Կարեն Դեմիրճյանի անվան Երևանի մետրոպոլիտեն» ՓԲԸ),

Կինոթատրոն «Մոսկվա» (ամառային կինոթատրոն), ( 1966 թ., ճարտ.` Ս.Կնտեղցյան, Թ. Գևորգյան, սեփ.՝ «Կինոթատրոն Մոսկվա» ՍՊԸ),

Երևանի մետրոպոլիտենի «Երիտասարդական» կայարան (1981 թ., ճարտ.` Ս. Քյուրքչյան, «Կարեն Դեմիրճյանի անվան Երևանի մետրոպոլիտեն» ՓԲԸ),

«Հրազդան» կենտրոնական մարզադաշտ (1971 թ., ճարտ.` Գ. Հակոբյան, Գ. Մուշեղյան, ՀԽՍՀ պետական մրցանակ՝ 1979 թ., սեփ.՝ «Հրազդան» կենտրոնական մարզադաշտ» ՓԲԸ),

Քաղաքաշինական համալիր «Կասկադ» («Գաֆէսճեան» արվեստի կենտրոն), (1980-ական թթ.- 2009 թ. Ճարտ.` Ջ. Թորոսյան, սեփ.՝ «Գաֆէսճեան» հիմնադրամ),

Կինոթատրոն «Այրարատ (Ռոսիա)», (1975 թ., ճարտ.` Ա. Թարխանյան, Ս. Խաչիկյան, Հ. Պողոսյան, ՀԽՍՀ պետական մրցանակ՝ 1979 թ., սեփ.` «Նարեկ» ՍՊԸ),

«Զվարթնոց» միջազգային օդանավակայանի հին մասնաշենք, (1981 թ., ճարտ.-ներ՝ Ա. Թարխանյան, Ս. Խաչիկյան, Լ. Չերքեզյան, Լ. Շեխյան, ՀԽՍՀ պետ. մրցանակ՝ 1985 թ.):

Նախագծի ընդունումը պայմանավորված է «Պատմության և մշակույթի անշարժ
հուշարձանների ու պատմական միջավայրի պահպանության և օգտա­գործման մասին» ՀՀ օրենքի 12-14-րդ հոդվածների պահանջները` Երևան քաղաքում գտնվող նորահայտ
հուշարձաններն անկախ սեփականության ձևից պետական հաշվառման վերցնելու,
Երևան քաղաքի պատմության և մշակույ­թի անշարժ հուշարձանների պետական ցուցակում ընդգրկելու և պատմա­մշա­կութային հուշարձանի կարգավիճակ տալու,
մշակութային ժառանգության հնարավորինս անաղարտ պահպանությունն ապահովելու
անհրաժեշտությամբ:

Ներկայացվող օբյեկտները ՀՀ մշակույթի նախարարության փորձագիտական հանձնաժողովի կողմից (2018 թ. հուլիսի 11-ի N 2 նիստ) արժևորվել են որպես
պատմամշակութային արժեքներ, որոնք կարևոր նշանակություն ունեն հայ մշակույթի և հայկական նորագույն ժամանակաշրջանի մոդեռնիստական ճարտարապետության ուսումնասիրման համար:

Ներկայում այդ օբյեկտները ներառված չեն Երևան քաղաքի պատմության և մշակույթի անշարժ հուշարձանների պետական ցուցակում, ինչի պատճառով հնարավոր չէ գործող օրենսդրության սահմաններում ապահովել դրանց անխաթար պահպանությունը, կանոնակարգել պահպանության, ուսումնա­սիրման, վերականգնման, օգտագործման և հանրահռչակման հետ կապված հետագա գործընթացները. իրավիճակ, որը կարող է պատճառ դառնալ այդ նորահայտ հուշարձանների ճարտարապետական արժեք­ների խաթարման, պատմագեղարվեստական տեսքի աղավաղման և պահպանվածության վիճակի վատթարացման: Ներկայացված օբյեկտներից մեկը՝ «Մոսկվա» կինոթատրոնի ամառային դահլիճը, ներառված է եղել «Հայաստանի Հանրապետության կառավարության 2004 թվականի հոկտեմբերի 7-ի «Հայաստանի Հանրապետության Երևան քաղաքի պատմության և մշակույթի անշարժ հուշարձանների պետական ցուցակը հաստատելու մասին» N 1616-Ն որոշմամբ հաստատված «Երևան քաղաքի պատմության և մշակույթի անշարժ հուշարձանների պետական ցուցակում (պետ. ցուցիչ՝ 1.6.178.3.2), սակայն ՀՀ կառավարության 2010 թ. մարտի 4-ի N 206-Ն որոշմամբ հանվել էր:

Տվյալ բնագավառում իրականացվող քաղաքականությունն է նոր հայտնաբերված
օբյեկտներին նորահայտ հուշարձանի կարգավիճակ տալը, Երևան քաղաքի պատմության
և մշակույթի անշարժ հուշարձանների պետական ցուցակում ընդգրկելը, դրանց
անխաթար պահպանության ապահովումը: