Oրհներգի երաժշտությունը դեռ 1879թ. է նոտայագրվել. գիտաշխատողը կոչ է անում չփոխել այն

Գրականության և արվեստի թանգարանի ավագ գիտաշխատող, երաժշտական արխիվի երաժշտական բաժնի պատասխանատու Մարինե Մուշեղյանն այսօր՝ ասուլիսի ժամանակ, հայտարարել է, որ հանրությանն անհայտ փաստ ունի ՀՀ գործող օրհներգի ծագումնաբանության մասին:

«Դժվար թե ես համաձակություն ունենայի այստեղ հայտնվելու, եթե չլիներ մի շատ կարևոր հանգամանք: Կոմիտասի թանգարանում Ալեքսանդր Սիրանոսյանի հետ դասախոսություն ենք ունեցել, հետաքրքիր փաստեր էինք գտնել, որոնք ներկայացրեցինք լեցուն դահլիճին: Եվ այսօր, երբ ակտուալ է դարձել փոխել-չփոխելու հարցը, պարտիզանական լռություն է պահում այդ շերտը»,- ասել է բանախոսը:

Մուշեղյանը հիշեցրել է, որ Միքայել Նալբանդյանի բանաստեղծությունը 1861-ին է տպագրվել, իսկ 1879 թվականին Եզնիկ քահանա Երզնկյանցի գրքում կա նոտագրությունը: Իսկ ժողովածուում Երզնկյանցն ասել է, որ երգերի մի քանի եղանակներ բուն տարբերակնելով են, կան հարմարեցվածներ, մի քանիսն էլ ինքն է հորինել:

«Նա առաջինն էր, որ նոտայագրեց: Հիմա ի՞նքն էր մեղեդու հեղինակը, թե՞ ոչ: Տարածված երգ էր, ինքը լսել, ձայագրել է, չենք կարող ասել: Ուզում եմ շեշտել՝ 1879 թվականից, այսինքն`մեր օրհներգը ունի պատմություն, պետք է ծանոթանալ, դրան, բազային գիտելիքներ ձեռք բերել նոր փոխել-չփոխելու մասին: Ինչո՞ւ մենք պետք է ամաչենք մեր այն օրհներգից, որն ունի 140 տարվա պատմություն»,- ասել է Գրականության և արվեստի թանգարանի ավագ գիտաշխատողը: