Հանրությանը խաղաղության նախապատրաստելը ամրագրված է դեռ 2006-ից. ԱԳՆ խոսնակ

Վերջին շրջանում Արցախյան հակամարտության կարգավորման ծիրում ամենաշահարկված դրույթը ժողովուրդներին խաղաղության պատրաստելու մասին դրույթն է, որը, սակայն, ԵԱՀԿ Մինսկի խմբի հայտարարություններում ամրագրված է դեռևս 2006 թվականից։ Այս մասին այսօր հայտարարեց Հայաստանի ԱԳՆ խոսնակ Աննա Նաղդալյանը՝ մեկնաբանելով այն հարցը, թե ինչ խաղաղության նախապատրաստման մասին են պայմանավորվել Հայաստանի և Ադրբեջանի ԱԳ նախարարները։

«Այդ դրույթի մասին բազմիցս հայտարարել է նաև հայկական կողմը՝ նշելով, որ ժողովուրդներին պետք է պատրաստել խաղաղության, այլ ոչ թե պատերազմի։ Փարիզում կայացած հանդիպումից հետո հանդիպման մասնակիցների կողմից արված հայտարարությունում նույնպես ամրագրվեց այդ դրույթը, և սա մի քանի եզակի, եթե ոչ միակ դեպքն է, որ դա ամրագրվում է բոլորի կողմից»,- ասաց խոսնակը։

Նա նշեց, որ այս դրույթը մշտապես ընդունելի է եղել Հայաստանի կողմից, ու զարմանալի է դժգոհության այն ալիքը, որն այդ հայտարարությունից հետո տարածվեց հանրության շրջանում։ Նաղդալյանի խոսքով, սակայն, հիմա կարևոր է, որ այդ խաղաղության նախապատրաստումը իրական լինի, ոչ թե կրի քարոզչական բնույթ։