«Հին Երևան» նախագիծը ոչ մի ընդհանուր բան չունի մայրաքաղաքի պատմական տեսքի հետ․ Ճարտարապետ

«Հին Երևան» նախագիծը որևէ ընդհանուր բան չունի Երևանի պատմական տեսքի վերականգնման հետ: Այս մասին փետրվարի 2-ին լրագրողների հետ հանդիպման ժամանակ հայտարարեց Հայաստանի ճարտարապետների պալատի նախագահ Մկրտիչ Մինասյանը: Նրա խոսքերով՝ ինքը չէր ցանկանա խոսել Արամի 23 փողոցում իրադարձությունների մասին․ այն կարելի է անվանել լավ բիզնես ծրագիր, որը հաստատվել է կառավարության կողմից:

«Ես հավանություն չեմ տալիս «Հին Երևան» նախագծին, և ոչ միայն ես, այն ոչ մի տեղ հավանության չի արժանացել։ Դա կարող է ձեռնտու լինել շահույթի տեսանկյունից, բայց դա ոչ մի կապ չունի այն նպատակների հետ, որոնք նախապես նշանակված էին: Տեղի է ունենում Թամանյանի հիմնական նախագծի խեղաթյուրում։ Դա բացատրվում է հսկայական շենքեր կառուցելու ցանկությամբ, որոնք նախատեսում են կառուցել։ Ոչ մի կերպ դա չի կարելի կոչել հին տեսքի վերականգնում», - նկատեց նա:

Անդրադառնալով Երևան քաղաքի կանաչապատմանը և օպերայի շենքի շուրջ սրճարանների հնարավոր ապամոնտաժմանը՝ Մկրտիչ Մինասյանն ընդգծեց, որ քաղաքի կանաչապատումն առաջնահերթ նշանակություն ունի: «Ժամանակին, երբ այդ սրճարանների սեփականատերերին ասացին, որ նման շինություններն ապօրինի բնույթ են կրում և այդ տարածքները հնարավոր է նորից քաղաքապետարանին վերադարձվեն, նրանք անտեսեցին դա։ Փոխզիջման հասնելու համար պետք է կառուցել միայն ամառային սրճարանները, որոնք ձմռանը կապամոնտաժվեն», - հավելեց Մկրտիչ Մինասյանը:

Ավելի վաղ մենք տեղեկացրել էինք, որ հունվարի 11-ին, ժամը 21: 48-ին «911» ծառայությունն ահազանգ էր ստացել, որ Արամ 23-ում գտնվող «Հայաստանի փոքրիկ երգիչներ» մանկապատանեկան ֆիլհարմոնիայի շենքում փլուզում է տեղի ունեցել և անհրաժեշտ է փրկարարների օգնությունը: Պարզվեց, որ այդ շենքում փլուզվել են երգչախմբի փորձերի համար նախատեսված դահլիճը (մոտ 35 քառ. մ) և առաստաղի մի մասը (մոտ 20 քմ): Բացի այդ, վնասվել էր ընդունարանի առաստաղը (առաստաղի և պատի վրա հայտնաբերվել են շուրջ 1.5 քառակուսի մետր ճաքեր): Փլուզվել է նաև ֆիլհարմոնիկ շենքին հարակից 23/3 (մոտ 18 քառ. մ) տան հյուրասենյակի արտաքին պատը և տան առաստաղը (մոտ 20 քառ․մ): ՆՆջասենյակի արտաքին պատին և առաստաղին ճեղքեր են հայտնաբերվել: