Կիևում մեկնարկել է Հայկական մշակույթի շաբաթը

Սերգեյ Փարաջանովի 95-ամյակին, Սիլվա Կապուտիկյանի 100-ամյակին և Կոմիտասի 150-ամյակին նվիրված միջոցառումներն անցկացվում են Ուկրաինայի մայրաքաղաքում «Հայկական մշակույթի շաբաթի» շրջանակներում:

Ինչպես հաղորդում է AnalitikaUA.net-ը, հունվարի 19-ից 25-ը Կիևում կազմակերպվում են թեմատիկ միջոցառումներ, որոնք մեծ հետաքրքրություն են առաջացնում մշակույթի, կերպարվեստի, երաժշտության, կինոյի և պոեզիայի սիրահարների շրջանում:

Կազմակերպիչները նշում են, որ հայ գործիչների ստեղծագործությունները ներկայացված են Օշեր Շվարցմանի անվան և Ժողովուրդների բարեկամության գրադարաններում, ինչպես նաև Կինոյի տանը: Միջոցառումների ծրագիրը ներառում է համերգներ, ցուցահանդեսներ, վարպետաց դասեր, գրական և երաժշտական երեկոներ ու ֆիլմադիտումներ՝ նվիրված հայկական մշակույթի ակնառու գործիչներին:

«ԱՕԿՍ-Ուկրաինա» Մշակութային կապերի հայկական միության ղեկավար Ելենա Հովհաննիսյանը հաղորդել է պարբերականին, որ միջոցառումների կազմակերպիչներն են «ԱՕԿՍ-Ուկրաինա» Մշակութային կապերի հայկական միությունը, Parajanov-ART-ը, Կիևում Պոդոլսկի շրջանի պետական վարչակազմի մշակույթի, զբոսաշրջության և մշակութային ժառանգության պահպանման բաժինը, Կիևի հրեական համայնքի ստեղծագործական նախաձեռնությունների կենտրոնը:

Ավելի վաղ հաղորդվում էր, որ Ուկրաինայում Հայերի միությունն ակտիվորեն աշխատում է ազգային պատմամշակութային արժեքների ճանաչման ուղղությամբ. կազմակերպության ղեկավար Վիլեն Շատվորյանը նշել է՝ ակնառու հայրենակիցների ստեղծագործությունները կշարունակեն ուրախացնել արվեստը գնահատողներին: