Շիրակի պետական համալսարանի ռեկտորի թափուր տեղի համար մրցույթը կանցկացվի մարտի 2-ին (լուսանկարներ)

Երեկ կայացել է Շիրակի պետական համալսարանի հոգաբարձուների խորհրդի նիստը, որը տևել է մոտ 10 ժամ: Հոգաբարձուների խորհուրդը որոշել է Շիրակի պետական համալսարանի ռեկտորի թափուր պաշտոնի համար մրցույթ հայտարարել, որը տեղի կունենա մարտի 2-ին: Ռեկտորի թափուր պաշտոնի բաց մրցույթի մասնակցելու համար փաստաթղթերի հանձնումն ավարտվելու է մրցույթի անցկացումից 6 օր առաջ, փետրվարի 22-ը լինելու է հայտերի ընդունման վերջնաժամկետը:

ՇՊՀ-ի ռեկտորի թափուր պաշտոնի համար կարող է առաջադրվել Հայաստանի Հանրապետության այն քաղաքացին, ով ունի գիտական աստիճան, բուհում առնվազն 3 տարվա դասավանդման փորձ և վերջին 15 տարվա ընթացքում առնվազն 5 տարվա հանրային կառավարման կամ բարձրագույն կրթության համակարգում առնվազն 5 տարվա
վարչական աշխատանքի փորձ:Նույն անձը չի կարող երկու անգամից ավել ընտրվել ռեկտորի պաշտոնում: Ռեկտորի պաշտոնում ընտրված կհամարվի այն թեկնածուն, ով կհավաքի խորհրդի ցուցակային կազմի 50 տոկոսից ավելի ձայն:

Շիրակի պետական համալսարանի ռեկտորի պաշտոնը թափուր էր մնացել 2018 թվականի մայիսի 18-ից,նախկին ռեկտոր Սահակ Մինասյանի հրաժարականից հետո:Մինչ օրս Բուհ-ի ռեկտորի ժամանակավոր պաշտոնակատարն է նախկին պռոռեկտոր Երվանդ Սերոբյանը:

Հոգաբարձուների խորհրդի անդամները քննարկել են նաև համալսարանի կանոնադրության մեջ Ռազմական ամբիոնին հատուկ կարգավիճակ տալու հարցը, քանի որ այն բուհի 13 ամբիոններից տարբերվում է և ղեկավարվում է նաև Պաշտպանության նախարարությունից։

Ռազմական ամբիոնին հատուկ կարգավիճակ շնորհելու որոշումը Հոգաբարձուների խորհուրդը հաստատել է և ուղարկելու է Կրթության ու գիտության և Պաշտպանության նախարարություններ, որտեղ հավանության արժանանալուց հետո, ամբիոնն իր շրջանավարտներին սպայական կոչում շնորհելու իրավունք կունենա։

Իսկ օրակարգային ամենաքննարկվող հարցերը վերաբերել են նրան, թե ինչ չափորոշիչների պետք է համապատասխանեն բուհի պրոռեկտորների, ամբիոնի վարիչների, դեկանների և ռեկտորների թեկնածուները։ Հոգաբարձուների խորհրդի որոշմամբ՝ բուհի այն պրոռեկտորների համար, ովքեր կկանոնակարգեն գիտակրթական ուղղությունը, 10 տարվա աշխատանքի ընթացքում պարտադիր է առնվազն 3 տարվա գիտամանկավարժական փորձը, իսկ դեկանների և ամբիոնների վարիչների համար 3 տարվա գիտամանկավարժական փորձ ունենալուց բացի, պարտադիր է նաև գիտական աստիճան ունենալը։