ԱՄՆ-ում սկսել են պատրաստվել 2020 թվականին կայանալիք նախագահական ընտրություններին

ԱՄՆ նախագահական ընտրություններին մասնակցող թեկնածուների բանավեճերի կազմակերպման հանձնաժողովը սկսել է նախապատրաստական աշխատանքները` 2020 թվականի ընտրություններին ընդառաջ: Գլխավոր խնդիրը բանավեճերի անցկացման տեղի ընտրությունն է: Այս մասին հայտարարեց Election Central պորտալը:

Հանձնաժողովը, որում ընդգրկված են երկու քաղաքական`Հանրապետական և Դեմոկրատական կուսակցությունների ներկայացուցիչներ, չորս տարին մեկ ձևակերպում է բանավեճերի անցկացման պայմանները, հաջորդ ընտրություններից մոտ երկու տարի առաջ տեղի փնտրտուքն արդեն սկսվել է:

Մասնավորապես, բանավեճի դահլիճը պետք է ունենա առնվազն 15 հազար քառակուսի մետր տարածք, որը կունենա մեծ ավտոկայանատեղի, որտեղ հնարավոր կլինի տեղադրել հեռուստատեսային սարքավորումներ և կայանել մոտ 500 ավտոմեքենա: Հարևանությամբ պետք է լինեն հյուրանոցներ` առնվազն 3 հազար սենյակով: Քաղաքի իշխանությունները, որտեղ տեղի են ունենալու նախագահի թեկնածուների բանավեճերը, պարտավոր են ապահովել նրանց անվտանգությունը:

Բանավեճի անցկացման վայրը սովորաբար հայտարարվում է ընտրություններից առնվազն մեկ տարի առաջ: 2016 թվականի նախագահական ընտրությունների քարոզարշավի ընթացքում հանրապետական թեկնածու Դոնալդ Թրամփը և դեմոկրատ թեկնածու Հիլարի Քլինթոնը բանավիճել են երեք փուլով`Նյու Յորքի Հոֆստրա համալսարանում, Սենթ Լուիսում գտնվող Վաշինգտոնի համալսարանում և Լաս Վեգասի Նևադա համալսարանում:

ԱՄՆ 59-րդ նախագահական ընտրությունները տեղի կունենան 2020 թ նոյեմբերի 3-ին: