Ինչպես են Ադրբեջանում սպանում բլոգերներին. Լապշինը պատմել է Բաքվի բանտում հանդիպած ադրբեջանցի բլոգերների ճակատագրի մասին

Արցախ այցելելու համար Ադրբեջանում դատապարտված, սակայն ավելի ուշ
ազատություն ստացած ռուս-իսրայելցի բլոգեր Ալեքսանդր Լապշինը ֆեյսբուքյան
իր պաշտոնական էջում պատմել է Բաքվի բանտում ադրբեջանցի բլոգերի սպանության
մասին, ըստ Լապշինի՝ ինքը եղել է վերջին մարդը, ով տեսել է այդ բլոգերին
մահից առաջ:

Լապշինը, մասնավորապես, պատմել է ադրբեջանցի բլոգեր
Մեհման Գալանդարովի մասին, որը դատապարտվել էր Ադրբեջանի նախագահ Իլհամ
Ալիևի դեմ քննադատական հրապարակումների համար, և որին Լապշինը պատահաբար
հանդիպել էր Բաքվի բանտի միջանցքներից մեկում:

«Նրա դեմքն ինձ անծանոթ էր: Նա ասաց՝ «Ալեքսա՛նդր, ողջո՛ւյն: Ես էլ եմ
բլոգեր: Դու ինձ հավանաբար չգիտես, բայց ես քեզ տեսել եմ հեռուստացույցով:
Իմ անունը Մեհման է: Օգնի՛ր ինձ, նրանք ինձ այստեղ կսպանեն», - հիշում է
ադրբեջանցի քաղբանտարկյալի խոսքերը Լապշինը:

Այն ժամանակ Լապշինը նրան պատասխանել է, որ չի պատկերացնում, թե ինչով
կարող է օգնել, որովհետև ինքը նույնպես այդտեղ է գտնվում անօրինականորեն:

«Միակ բանը, որ ես կարող էի անել նրա համար, իր մասին տեղեկության
փոխանցումն էր Ռուսաստանի ու Իսրայելի դեսպաններին, որոնք ինձ այցելում էին
բանտում: Արդեն երբ ազատվեցի ադրբեջանական գերությունից ու վերադարձա
Իսրայել, սկսեցի փնտրել այդ մարդուն: Պարզվեց, որ բլոգերը գազանաբար
սպանվել է բանտի միջանցքում մեր պատահական հանդիպումից ընդամենը երեք օր
անց», - գրում է ռուս-իսրայելցի բլոգերը՝ նշելով, որ Գալանդարովի մահը
Ադրբեջանում ներկայացրին որպես ինքնասպանություն:

Լապշինը նաև հավելել է, որ ինքը ճանաչում է Մեհման անունով ևս մեկ
ադրբեջանցի բլոգերի՝ Մեհման Հուսեյնովին, որին թեև անձամբ չի տեսել, սակայն
ծանոթ է վիրտուալ կերպով: Ռուս-իսրայելցի բլոգերը նշել է, որ Հույսեյնովն
այժմ նույն բանտում է:

«Նույն բանտում է նաև մարդասպանների խումբը,
որոնք սպանել ու փոսն էին գլորել Գալանդարովին: Ես վախենում եմ տղայի
կյանքի համար», - գրել է Լապշինը: