2019 թվականը հռչակվելու է Կովկասյան ընձառյուծի տարի

Կառավարության նիստում բնապահպանության նախարարի պաշտոնակատար Էրիկ Գրիգորյանը այսօր ներկայացրել է զեկույց, որով նախատեսվում է 2019 թվականը հռչակել Կովկասյան ընձառյուծի տարի:

Նախարարի պաշտոնակատարի խոսքերով՝ 2018 թվականի գարնանը «Խոսրովի անտառ» պետական արգելոցում Բնության համաշխարհային հիմնադրամի ֆոտոթակարդները, առաջին անգամ արգելոցի պատմության մեջ, նկարահանեցին կովկասյան ընձառյուծ, որը նախկինում չի արձանագրվել որևէ ֆոտոթակարդի կողմից։

Այդ կենդանատեսակը գրանցված է ՀՀ Կարմիր գրքում և Բնության պահպանության միջազգային միության (IUCN) Կարմիր ցուցակում՝ «կրիտիկական» կարգավիճակով: Ներկայումս Հայաստանում հաշվառվում է 7-9 ընձառյուծ, որոնց ապրելավայրերն են Արարատի, Վայոց ձորի և Սյունիքի մարզերը:

Տեղադրված ֆոտոթակարդների արձանագրած նյութերը ցույց են տալիս, որ անցյալ տարվա հրդեհից հետո բնությունը վերականգնվում է, եթե ընձառյուծը վերադարձել է արգելոց, դա նշանակում է, որ նա ունի բավարար քանակությամբ որս։

2019 թվականը Կովկասյան ընձառյուծի տարի հռչակելը, ըստ Էրիկ Գրիգորյանի, կնպաստի վեհաժողովների, ֆիլմերի, ցուցահանդեսների կազմակերպման միջոցով անհետացման եզրին գտնվող ընձառյուծի մասին առավել լայն լուսաբանմանը, ինչպես նաև հասարակության իրազեկման բարձրացմանը։ Այն նաև հնարավորություն կընձեռի զարգացնել և հզորացնել հատուկ պահպանվող տարածքները թե՛ բնության պահպանության, թե՛ էկոտուրիզմի կազմակերպման տեսանկյունից։

2019 թվականի ընթացքում նախատեսվում է իրականացնել մի շարք միջոցառումներ, մասնավորապես՝ թողարկել Կովկասյան ընձառյուծի թեմայով նամականիշ, կազմակերպել Կովկասյան ընձառյուծի միջազգային վեհաժողով, նկարահանել Հայաստանի կենսաբազմազանության մասին ֆիլմ, կազմակերպել համապատասխան ցուցահանդեսներ: