Ավիատոմսերի գները նվազել են

Նախորդ տարվա այս ժամանակահատվածի համեմատ այս տարի Հայաստանում որոշ ուղղություններով ավիատոմսերի գների նվազում է արձանագրվում: Մասնավորապես, նախորդ տարվա նույն ժամանակահատվածի համեմատ նվազել են Երևան-Մոսկվա և դեպի եվրոպական ուղղություններով ավիատոմսերի գները:

Նախորդ տարվա համեմատ աճել են դեպի Եգիպտոս ու Դուբայ ավիատոմսերի գները: Այս Ամանորին Եգիպտոսում ու Դուբայում հանգստացողները միայն 600 դոլարին համարժեք դրամ և ավելի գումար մեկ անձի համար պետք է վճարեն ավիատոմսի գինը: Տուրիստական գործակալություններում հաճախորդներին բացատրում են, որ դա հիմնականում կապված է չարտերային չվերթների հանգամանքով, ավիաընկերությունները պետք է այնպիսի հաշվարկ անեն, որպեսզի վնաս չկրեն, եթե քիչ վաճառք իրականացվի:

Եթե նախորդ տարիներին Ամանորի շեմին կտրուկ բարձրանում էին դեպի եվրոպական երկրներ ուղղություններով ավիատոմսերի գները, ապա այս տարի մասնագետներն արձանագրում են, որ ամռան ու գարնան սեզոնի համեմատ ընդամենը 5-10 տոկոսով են թանկացել ավիատոմսները, իսկ նախորդ Ամանորին ընդառաջ ժամանակահատվածի համեմատ՝ գների նվազում է արձանագրվել:

Հատկապես եթե մարդիկ 1-1.5 ամիս վաղ են ամրագրել, մատչելի տոմսեր են ձեռք բերել:

«Երևանից դեպի Եվրոպա այս տարի համեմատաբար ավելի լավ գներ են, արդեն բավական վաճառքներ կան: Եթե նախորդ տարի այս ժամանակահատվածում ավելի թանկ էր, օրինակ, դեպի Պրահա, Իտալիա և հակառակ ուղղությամբ 500-600 եվրոյին համարժեք դրամ արժեր մեկ տոմսը, այս տարի մարդիկ 400 եվրոյին համարժեք դրամ են վճարել: Բացի դա, այս տարի ավելի քիչ են հայաստանցիները Թիֆիլիսով մեկնում եվրոպական երկրներ» ,- Lragir.am-ին ասաց «Շելբի Տուր» ընկերության ավիատոմսերի վաճառքի մասնագետ, տուր մենջեր Ջուլիաննա Սարկիսովան:

«Ռիմա թրավել» տուրիստական ընկերության տնօրեն Ռիմա Խաչատրյանը Lragir.am-ին ասում է, որ հիմնականում նույն գներն են, որոնք ամռանն ու գարնանն են առաջարկվել եվրոպական ուղղություններով: Իսկ եթե նախորդ տարվա այս ժամանակահատվածի հետ համեմատենք, նվազում կա: Ռիմա Խաչատրյանը ևս ասաց, որ միտում է նկատվում, որ այս տարի Ամանորը եվրոպական և այլ երկրներում նշող հայաստանցիները հիմնականում գերադասում են Երևանից թռիչքը: Նախորդ տարիներին, հիշեցնենք, հատկապես եվրոպական ուղղություններ հիմնականում մեկնում էին Թբիլիսիից:

“Միտում է նկատվում, որ ավելի շատ Հայաստանից են մեկնում ՀՀ քաղաքացիները, քան Վրաստանից, քանի որ գնային մեծ փոփոխություն չկա: Այն, որ հաշվարկում են, որ Երևանից պետք է հասնեն Թբիլիսի, հետո նորից գան Հայաստան, բավական գումար եմ ծախսելու, այս համեմատությունը երբ կատարում են, մտածում են՝ ավելի լավ է գնան Երևանից”,- ասաց նա:

Ըստ Ռիմա Խաչատրյանի՝ դեպի Մոսկվա և հակառակ ուղղությամբ ևս ավիատոմսերն այս տարի ավելի մատչելի են մարդկանց, քաղաքացիները չեն բողոքում տոմս գնելիս:

Նշենք, որ այս տարի նաև չի նկատվել նախորդ տարվա ամռանը տեղի ունեցած իրավիճակը, երբ ավիաընկերությունները հայտարարում էին, թե չունեն էկոնոմ կարգի մատչելի տոմսեր և թանկ տոմսեր էին վաճառում: Այդ աժիոտաժը եղել էր ամռան հանգստի սեզոնին, նաև պահպանվել էր Ամանորին ընդառաջ: «Նախորդ տարի ամռանը չլսված գներ էին, Երևան-Մոսկվա ուղղությամբ տոմսերը 200-300 հազար դրամ էին, իսկ դեպի Եվրոպա՝ 700-800 եվրոյին համարժեք դրամ: Այս տարի մենք այդ գնային փոփոխությունները չենք տեսնում»,- նշում է Ռիմա Խաչատրյանը:

Մասնագետի խոսքով՝ միտումներ կան, որ «բաց երկնքի» քաղաքականությունն այս պայմաններում կարող է գործել: Պետք է աշխատանք տանել սեփական ավիաուղիների ստեղծման ուղղությամբ:

“Եթե լուրջ աշխատանք տարվի, բաց երկնքի քաղաքականությունը կգործի, ինչը կբերի զբոսաշրջության կտրուկ աճի: Պարզապես պետք է խստորեն վերահսկել դաշտը, որպեսզի անորակ ծառայությունները դուրս մղվեն”,- նշեց Ռիմա Խաչատրյանը:

Նա ահազանգում է, որ շուկայում հայտնվել են տարբեր տուրիստական գործակալություններ, որոնք այս օրերին մատչելի գներով փաթեթներ են առաջարկում դեպի Եգիպտոս, ԱՄԷ և այլ երկրներ: «Ես ուզում եմ մեր քաղաքացիներին հորդորել, որ չգայթակղվեն այդ գներով, այս օրերին զգոն լինեն և նորաբաց պատահական ընկերություններից չգնեն այդպիսի փաթեթներ և Ամանորն անցկացնեն օդանավակայանում: Ամեն տարի 1-2 անգամ նման դեպքեր լինում են, քաղաքացիները գնում են օդանավակայան և տեսնում են, որ այդ չվերթը չի իրականացվում»,- ասաց նա: