Գորիսում հիմնվում է ֆուտբոլային ակադեմիա. մեկնարկում են ֆուտբոլի դաշտի հիմնանորգման աշխատանքները (լուսանկարներ)

Շվեցարահայ բարերարի ֆինանսական օժանդակությամբ, ՀՖՖ և Գորիսի համայնքապետարանի հետ համատեղ մեկնարկում են ֆուտբոլի դաշտի հիմնանորգման աշխատանքները, համայնքում ֆուտբոլի զարգացմանն ուղղված ծրագրերը։

Գորիսում հիմնվում է նաև ակադեմիա` մինչև 300 երեխայի համար։

Ծրագրի շրջանակներում սերտ համագործակցություն է սկսվել նաև «Արցախ» ֆուտբոլային ակումբի հետ։

«Դաշտի հիմնանորոգումից հետո համատեղ համագործակցության արդյունքում երկուստեք ջանքերն ուղղվելու են Գորիսում ֆուտբոլը պրոֆեսիոնալ մակարդակի հասցնելու համար։ Գորիսի համայնքապետարանը բարձր է գնահատում համագործակցող բոլոր կողմերի ջանքներն ու պատրաստակամությունը համայնքում սպորտային կյանքի զարգացումը խրախուսելու, խոշոր ներդրումների և վստահության համար»,- ասվում է Գորիսի համայնքապետարանի տարածած հաղորդագրության մեջ:

Աշխատանքային այցով Գորիս է այցելել «Արցախ» ֆուտբոլային ակումբի հիմնադիր նախագահ Սևան Ասլանյանը։ Աշխատանքային այցի շրջանակներում Գորիսի համայնքի ղեկավար Առուշ Առուշանյանի հետ քննարկվել են մի շարք կարևոր հարցեր` ուղղված Գորիսում ֆուտբոլի զարգացմանը, առաջիկա ծրագրերին։

Մարտի 1-ից մեկնարկում է ծրագրի առաջին փուլը` հիմնանորոգվում է Գորիսի ֆուտբոլի դաշտը, որից հետո, Սևան Ասլանյանի խոսքերով, Արցախի թիմը 2019-2020թթ ֆուտբոլային նոր շրջանի տնային խաղերը անց է կացնելու ոչ թե Երևանում, այլ` Գորիսում` հաշվի առնելով ֆուտբոլային ավանդույթները։

Այսպիսով փորձ է արվելու համատեղ համագործակցության արդյունքում զարգացնել ֆուտբոլը և առավել պրոֆեսիոնալ հիմքեր ստեղծել։

Նախատեսվում է նաև Եվրոպայից հրավիրել ակադեմիայի տեխնիկական տնօրեն, ով երեք տարի պայմանագրային ժամկետով կվերապատրաստի մարզիչներին և կկրթի երեխաներին։

Այսօր Շվեցարահայ բարերարի աջակցությամբ 90 երեխա ստացել են մարզական կոշիկներ, գնդակներ և ֆուտբոլային պարագաներ։ Տրվել է համագործակցության և համատեղ աշխատանքի մեկնարկը։ Գորիս համայնքի ղեկավարն իր հերթին ընդգծել է, որ Գորիսում սպորտի զարգացմանն ուղղված նախաձեռնությունները պետք է շոշափելի արդյունք ունենան և համայնքի կողմից ներդրվելու են հնարավոր ջանքերը մաքսիմալ առաջընթացի հասնելու համար։

Լուսանկարներում հիմնանորոգումից հետո Գորիսի ֆուտբոլի դաշտի վերջնական տեսքն է։