Պուտինը՝ աշխարհը ղեկավարելու մասին

«Մենք գիտենք, թե որտեղ է գտնվում այն շտաբը, որում փորձում են ղեկավարել ամբողջ աշխարհը: Եվ այն Մոսկվայում չէ»,- այսօր հրավիրված մեծ ասուլիսի ժամանակ Վլադիմիր Պուտինը պատասխանել է այն հարցին, թե տարածված կարծիք կա, որ ինքը ցանկանում է ղեկավարել ամբողջ աշխարհը:

Պուտինը շեշտել է, որ աշխարհը ղեկավարելու լուրջ նպատակներ ունի ԱՄՆ-ն: Ըստ ՌԴ նախագահի՝ աշխարհում ձևավորված թյուր կարծիք կա ՌԴ-ի մասին:

«Մասնավորապես, Արևելյան Եվրոպայում ծաղկում է ռուսաֆոբիան, որը հիմնավորվում է անցյալի պատմական վախերի վրա, և դա արվում է տվյալ երկրներում ներքին քաղաքական բարեկեցություն ապահովելու համար»,- ասել է ՌԴ նախագահը և հավելել, որ իհարկե շատ վատ է անցյալի իրադարձությունների շահարկումը, ինչն էլ իր հերթին խանգարում է առաջ շարժվելուն:

Ըստ Պուտինի՝ Ռուսաստանի նպատակն է արտաքին քաղաքականությունում ապահովել լավ պայմաններ ՌԴ-ի զարգացման համար, ինչպես նաև ապահովել և ամրապնդել ՌԴ դիրքերը միջազգային հարթակում: