ԱՄՆ-ի մի շարք կոնգրեսականներ և Սենատի անդամներ շնորհավորել են վարչապետի պաշտոնակատար Նիկոլ Փաշինյանին

ԱՄՆ-ի մի շարք կոնգրեսականներ եւ Սենատի անդամներ շնորհավորել են վարչապետի պաշտոնակատար Նիկոլ Փաշինյանին Հայաստանում անցած արտահերթ խորհրդարանական ընտրությունների կապակցությամբ, հաղորդում է «Ամերիկայի ձայնը»:

Կոնգրեսականներ Ֆրենք Փալոնեի, Դեյվիդ Թրոթի, Ջեքի Սփիեռի, Ադամ Շիֆի, Դեյվիդ Վալադաոյի, Գաս Բիլիրաքիսի, ինչպես նաեւ սենատորներ Էդվարդ Մարքիի, Ջեք Ռիդի եւ Շելդոմ Վայթհաուսի ստորագրությամբ նամակում նշված է, որ անցնող տարվա ապրիլից Հայաստանի Հանրապետոթյունում արձանագրվեցին փոփոխություններ խաղաղ եւ ժողովրդավարական ճանապարհով: Այս փոփոխություններով, ըստ ամերիկացի օրենսդիրների, Հայաստանի ժողովուրդն իր աջակցությունն էր հայտնել բաց ժողովրդավարությանը:

Կիրակի օրը կայացած ընտրությունները ազատ եւ արդար ընտրական գործընթացի եւ ընթացիք ժողովրդավարական բարեփոխումների ջատագովների եւս մեկ հնչող հաղթանակներից էր: Կոնգրեսականներն ու սենատորները կոչ են արել Հայաստանի իշխանություններին շարունակել ջանքեր գործադրել հետագա կառավարման համակարգի թափանցիկության, ժողովրդավարական ինստիտուտների ամրապնդման եւ քաղաքացիական հասարակության զարգացման ուղղությամբ:

«Մենք ցանկանում ենք հայ ժողովրդին հավաստիացնել, որ կշարունակենք աջակցել Ձեր ժողովրդին տարածաշրջանային անվտանգության եւ տնտեսական բարգավաճման ապահովման ուղղությամբ Ձեր հաստատուն քայլերին: Մենք կշարունակենք բացահայտել նոր հնարավորություններ օգնելու Հայաստանի ջանքերին դիվերսիֆիկացնել իր տնտեսությունը, ամրապնդել առեւտրային կապերը Միացյալ Նահանգների նման երկրների հետ եւ շարունակել գործել որպես անվտանգ ապաստարան կրոնական փոքրամասնությունների համար, որոնք Մերձավոր Արեւելքում լքել են իրենց տները՝ բռնաճշումներից խուսափելու համար: Մենք հպարտ ենք մեր երկրների միջեւ երկկողմ ամուր հարաբերություններով եւ ցանկանում ենք խթանել մեր պատմական եւ բարեկամական կապերը»,- գրում են օրենսդիրները:

Նամակում ամերիկացի խորհրդարանականներն ընդգծում են, որ տեղի ունեցած ընտրություններն անցել են խաղաղ, հանգիստ պայմաններում եւ զերծ էին կոռուպցիայից ու ընտրողների նկատմամբ ճնշումներից: Նրանք պատրաստակամություն են հայտնել շարունակել արդյունավետ եւ առողջ երկխոսությունը Փաշինյանի գլխավորած վարչակազմի հետ: