Կերչյան ճգնաժամը ձեռնտու է և՛ Պուտինին, և՛ Պորոշենկոյին. Ալեքսեյ Վենեդիկտով

Կերչի նեղուցում ստեղծված լարված իրավիճակը ձեռնտու է և՛ ՌԴ նախագահ Պուտինին, և՛ Ուկրաինայի նախագահ Պորոշենկոյին, նման կարծիք է հայտնել «Эхо Москвы» ռադիոկայանի գլխավոր խմբագիր Ալեքսեյ Վենեդիկտովը:

Ռադիոկայանի կայքում հրապարակված նյութում Վենեդիկտովը, մասնավորապես, նշել է, որ Վլադիմիր Պուտինն ու Պյոտր Պորոշենկոն կարող են հմտորեն օգտագործել առկա ճգնաժամը՝ ամեն մեկն իր երկրում իր նվազող վարկանիշը բարձրացնելու նպատակով:

Փորձագետը շեշտել է, որ անկում ապրող վարկանիշի ֆոնին ժողովրդին «արևմտյան զավթիչների» կողմից աջակցություն ստացող «ագրեսոր» հարևանի վտանգի շուրջ միավորելու հնարքը Պուտինն արդեն մի քանի անգամ կիրառել է Էստոնիայի և Վրաստանի հետ կոնֆլիկտների ժամանակ:

Իր հերթին, Պորոշենկոն, ում վարկանիշն իր երկրում այժմ այնքան ցածր է, որ նա կարող է անգամ չանցնել ընտրությունների երկրորդ փուլ, հնարավորություն ունի օգտագործելու ճգնաժամը՝ ռազմական դրություն մտցնելով ընտրությունները հետաձգելու համար:

«Կարևոր չէ, թե ով է սկսել «կերչյան ճգնաժամը»: Կարևոր է, որ քաղաքական տեսանկյունից իրենց երկրներում հաղթում են և՛ Ռուսաստանի, և՛ Ուկրաինայի նախագահները», - ասել է Վենեդիկտովը:

Հիշեցնենք, որ նոյեմբերի 25-ի առավոտյան ՌԴ Անվտանգության դաշնային ծառայությունը հայտնել է Ուկրաինայի ռազմածովային ուժերին պատկանող նավերի կողմից ռուսական ջրային սահմանի խախտման մասին:

Նշվում է, որ երեք ուկրաինական նավ ուղղություն է վերցրել դեպի Կերչի նեղուց՝ նախապես նավերի անցման համար համապատասխան դիմում չներկայացնելով: Արդյունքում ռուսական կողմը բեռնանավերով փակել է նեղուցը:

Բացի այդ, ռուսական սահմանապահ նավը վնասել է ուկրաինական քարշակին, որը հետևում էր նավերի խմբին: Այնուհետև Ռուսաստանն Ուկրաինայի ռազմածովային ուժերի գործողությունների պատճառով Սու-25 օդանավերը հերթապահության է ուղարկել Կերչի նեղուցի շրջանում:

Կիևը Մոսկվային մեղադրել է բացահայտ ագրեսիվ գործողություններ կատարելու համար: Կիևը նաև հայտնել է Ռուսաստանի կողմից իր նավերի ուղղությամբ կրակ բացելու ու նավերը գրավելու մասին: Ուկրաինայի ռազմածովային ուժերի փոխանցմամբ՝ ռուս սահմանապահները նավերը կանգնեցրել են զենքի կիրառմամբ: