ԱՄՆ պետքարտուղարը Սաուդյան Արաբիայից հետո Թուրքիա կայցելի՝ լրագրող Ջամալ Հաշքաջիի ամհետացման գործով

ԱՄՆ Պետքարտուղար Մայքլ Պոմպեոն Սաուդյան Արաբիայից հետո Թուրքիա կայցելի՝ սաուդյան լրագրող Ջամալ Հաշքաջիի անհետացման կապակցությամբ։ Այս մասին երկուշաբթի օրը հաղորդել է Սպիտակ տան Ազգային անվտանգության խորհրդի ներկայացուցիչը։

ԱՄՆ նախագահ Դոնալդ Թրամփը «կարգադրել է պետքարտուղար Պոմպեոյին անմիջապես Էր–Ռիյադ մեկնել, իսկ հետո Թուրքիա, որպեսզի հանդիպի թագավոր Սալմանի և թուրքական պաշտոնատար անձանց հետ» համապատասխանաբար,– նշել է նա։ «Անհրաժեշտ է, որպեսզի թուրքական իշխանությունները, Սաուդյան Արաբիայի լիակատար և թափանցիկ աջակցությամբ, կարողանան մանրակրկիտ հետաքննություն իրականացնել և այն ավարտելուց հետո հրապարակեն դրա արդյունքները»,– նշել են Անվտանգության խորհրդում, ավելացնելով, որ Պետդեպարտամենտը «այս հարցով մշտական կապի մեջ է գտնվում թուրքական և սաուդյան գործընկերների հետ»։

Հաշքաջին հայտնի է Էր–Ռիյադի ներկայիս քաղաքականության վերաբերյալ իր քննադատական ելույթներով։ 2017 թվականին նա լքել էր հայրենիքը և ԱՄՆ–ում էր հաստատվել։ Լրագրողը, մշտական հիմունքներով, հոդվածներ էր գրում The Washington Post–ի համար։ Հոկտեմբերի 2-ին նա Ստամբուլում Սաուդյան Արաբիայի հյուպատոսություն է գնացել փաստաթղթերը ձևակերպելու համար և այդ ժամանակվանից անհետացել է։