Նկարիչ Արամ Սարիբեկյանին դանակահարել են

Սանկտ Պետերբուրգում դանակով վիրավորել են հայտնի նկարիչ, միջազգային նկարչական ցուցահանդեսների մասնակից, պետերբուրգյան հիմնադրամի դափնեկիր, 48-ամյա Արամ Սարիբեկյանին:

Ինչպես հաղորդում է «Նևսկիե նովոստի» պարբերականը, միջադեպը տեղի է ունեցել հոկտեմբերի 10-ին՝ 21:00-ի սահմաններում, նկարչի տան մոտակայքում: Նրա վրա հարձակվել է քրեական դատվածություն ունեցող 34-ամյա Անդրեյ Պ.-ն: Նա նախկինում դատապարտվել է «ծանր մարմնական վնասվածքներ հասցնելու մասին» և «կողուպուտ» հոդվածներով:

Դիմանկարչին հոսպիտալացրել են քաղաքային հիվանդանոցներից մեկը: Բժիշկները Սարիբեկյանի մոտ ենթածնոտային հատվածի կտրած վերք են ախտորոշել: Ներկա պահին նա դեռ գտնվում է բուժհաստատությունում, նրա վիճակը գնահատվում է որպես բավարար:

Աղբյուրի տվյալներով՝ հարձակման կասկածյալը ձերբակալվել է, սակայն հարցաքննությունից հետո նրան ազատ են արձակել չհեռանալու ստորագրությամբ:

Նշվում է, որ կասկածյալն ապրում է տուժածի հարևանությամբ: Նրա նկատմամբ քրեական գործ է հարուցվել «Զենքի կիրառմամբ առողջությանը կանխամտածված վնաս հասցնելու» հոդվածով:

Արամ Սարիբեկյանը ծնվել է Երևանում, մասնագիտական կրթություն է ստացել Մոլդովայում: Ներկայում բնակվում է Սանկտ Պետերբուրգում: Նրա անհատական ցուցահանդեսներն անցկացվել են Նորվեգիայում, Շվեդիայում, Շվեյցարիայում, Հայաստանում և այլ երկրներում: