Պուտինը Փաշինյանի առաջ բարձրացնելու է ՀՀ նախկին ղեկավարների հետապնդման հարցը

Վարչապետ Նիկոլ Փաշինյանն այսօր այցելելու է Մոսկվա, որտեղ նրան ընդունելու է Ռուսաստանի նախագահ Վլադիմիր Պուտինը։ Սա երկու ղեկավարների երրորդ հանդիպումն է և սպասվում է, որ լուրջ քննարումներ են լինելու դրա ընթացքում, ինչի մասին հայտարարել են երկու կողմերը։

Ռուսական «Կոմերսանտ» պարբերականի տվյալներով՝ Ռուսաստանի նախագահը Հայաստանի վարչապետի առաջ բարձրացնելու է ՀՀ նախկին ղեկավարների հետապնդման հարցը։ «Մարտի 1-ի» գործով այդ հետապնդման տակ են երկրորդ նախագահ Ռոբերտ Քոչարյանը և Երևանի կայազորի այն ժամանակվա ղեկավար (այժմ ՀԱՊԿ քարտուղար) Յուրի Խաչատուրովը։ Նրանք մեղադրվում են սահմանադրական կարգի տապալման մեջ։

«Ռոբերտ Քոչարյանը մեկն է այն սակավաթիվ մարդկանցից, ում Վլադիմիր Պուտինն իր ընկերն է համարում։ Այս մարդկանց թվում են նաև Սիլվիո Բեռլուսկոնին (Իտալիայի նախկին վարչապետը) և Գերհարդ Շրյոդերը (Գերմանիայի նախկին կանցլեր)», –ռուսական լրատվամիջոցի հետ զրույցում նշել է նրանց աղբյուրը։

«Կոմերսանտը» հիշեցնում է, որ Քոչարյանի նկատմամբ հատուկ վերաբերմունքը Պուտինը ցուցադրել է՝ օրերս անձամբ շնորհավորելով նրան 64-ամյակի կապակցությամբ։ Ինչ վերաբերում է Յուրի Խաչատուրովին, ապա Մոսկվայում համարում են, որ ՀԱՊԿ քարտուղարին նման մեղադրանք ներկայացնելը փչացնում է կազմակերպության հեղինակությունը։ Ավելին, հատկապես դժգոհություն առաջացրել է այն, որ մինչ մեղադրանքն ներկայացնելը Հայաստանում հարկ չեն համարել նման մտադրության մասին տեղեկացնել ՀԱՊԿ գործընկերներին։

«Դա կարելի էր անել հանգիստ՝ սպասելով Հավաքական անվտանգության խորհրդին (կազմակերպության անդամ պետությունների ղեկավարների հանդիպումը) ու պարզաբանելով իրավիճակը»,– նշել է դիվանագիտական աղբյուրը։

Այս շտապողականության արդյունքում, ըստ ռուսական պարբերականի, ՀԱՊԿ քարտուղարի պաշտոնը կարող է անցնել Բելառուսին (այս պաշտոնը ռոտացիոն է, հերթով զբաղեցնում են անդամ պետությունների ներկայացուցիչները)։ Պատճառն այն է, որ կազմակերպության կանոնադրությունը որևէ տեղ չի ֆիքսում, որ քարտուղարի վաղաժամ հետկանչի դեպքում այդ պաշտոնում կրկին նշանակվելու է նույն պետության ներկայացուցիչը։

Մեկ այլ խնդրահարույց հարց է Հայաստանում գործող «Հարավկովկասյան երկաթուղիներ» ընկերության ստուգումն ու դրան մեղադրանք ներկայացնելը։ Հայաստանի իշխանություններն ընկերությանը մեղադրում են հարկային պարտավորությունները չկատարելու մեջ՝ ընկերությունը բյուջե չի մուտքագրել 9,7 միլիոն դրամ։ Այդ ընկերությունը ռուսական սեփականատերեր ունի, և Մոսկվայում համարում են, որ Հայաստանում չափն անցել են։