ԱՄՆ-ն մտահոգված է Իրանին 20,7 մլն դոլար տրամադրելու Եվրամիության որոշմամբ

Միացյալ Նահանգների իշխանությունները կարծում են, որ Եվրամիության ղեկավարության հայտարարությունը՝ տնտեսական հարաբերություններն ընդլայնելու նպատակով Իրանին 20,7 մլն դոլար տրամադրելու մտադրության մասին, «ոչ ճիշտ ժամանակ արված ոչ ճիշտ ուղերձ է»։

Այդ մասին հայտարարել է Իրանի գծով ԱՄՆ-ի հատուկ ներկայացուցիչ Բրայան Հուկը։

«Եվրոպացի հարկատուների օգնությունը հնարավորություն է տալիս իրանական ռեժիմին շարունակել անտեսել սեփական ժողովրդի կարիքները»,- ասել է նա։

Պաշտոնյան նաև ընդգծել է, որ ԱՄՆ-ն ու ԵՄ-ն պետք է միասին աշխատեն՝ երկարաժամկետ լուծում գտնելու համար, որը «կաջակցեր իրանցի ժողովրդին ու վերջ կդներ տարածաշրջանում Իրանի իշխանությունների կողմից անվտանգության սպառնալիքին»։

Օգոստոսի 23-ին Եվրահանձնաժողովի մամուլի ծառայությունը հայտնել էր, որ հավանություն է տվել Իրանին ուղղված օգնության առաջին փաթեթին՝ 18 մլն եվրոյի (20,7 մլն դոլար) չափով։

Օգոստոսի 7-ին էլ ԵՄ-ն գործարկել է եվրոպական արգելափակող կանոնակարգը, որն անվավեր է ճանաչում ԵՄ տարածքում Իրանի նկատմամբ ԱՄՆ-ի սահմանած պատժամիջոցների գործողությունը, արգելում է եվրոպական ընկերություններին նպաստել դրանց իրականացմանը, ինչպես նաև արգելում է օտարերկրյա դատարանների ցանկացած որոշման իրագործում, որը կայացվել է այդ պատժամիջոցների հիման վրա։

Ավելի վաղ Բրայան Հուկը հայտարարել էր, որ ԱՄՆ-ն պատրաստ է երկրորդական պատժամիջոցներ կիրառել այն երկրների նկատմամբ, որոնք կշարունակեն համագործակցել Իրանի Իսլամական Հանրապետության հետ։

«Մենք ակնկալում ենք, որ առևտրային ակտիվությունը, այդ թվում՝ բեռնափոխադրումները, մինչև նոյեմբեր կհասցվեն զրոյի։ Մենք հույս ունենք, որ մեր գործընկերները կհետևեն պատժամիջոցների ռեժիմին, և ես կարծում եմ, որ կարիք չկա հիշեցնելու ԱՄՆ-ի՝ երկրորդական պատժամիջոցներ կիրառելու պատրաստակամության մասին»,- ասել էր ամերիկացի պաշտոնյան։

Հիշեցնենք, որ Իրանն ու «միջնորդ վեցյակը» 2015թ. հուլիսի 14-ին պատմական համաձայնության են եկել իրանական ատոմային երկարամյա խնդրի կարգավորման հարցում. Գործողությունների համատեղ համապարփակ ծրագիր է ընդունվել, որի իրագործմամբ վերացվում են Իրանի դեմ ՄԱԿ-ի ԱԽ-ի, ԱՄՆ-ի և Եվրամիության սահմանած տնտեսական և ֆինանսական պատժամիջոցները:

Ամիսներ առաջ, սակայն, ԱՄՆ նախագահ Դոնալդ Թրամփը հայտարարել է, որ երկիրը դուրս է գալիս Իրանի միջուկային ծրագրի համաձայնագրից և կրկին պատժամիջոցներ կսահմանի Իրանի դեմ: