Երևանի քաղաքապետարանը դիտարկում է տրանսպորտի բարեփոխումները վարկային միջոցներով իրականացնելու հնարավորությունը
Երեւանի քաղաքապետարանը, հաշվի առնելով մայրաքաղաքային տրանսպորտի վատթար վիճակը, նախաձեռնել էր լայնամասշտաբ բարեփոխումներ։ Նախատեսվում էին ավտոբուսային պարկի փոփոխություն կատարել, փոխել երթուղիները եւ վճարման համակարգը։ Փետրվարին եղած տվյալներով՝ այս տարվա ավարտին նախատեսվում էր ունենալ կնքված պայմանագիր։
Կապված բարեփոխումների շուրջ որեւէ տեղեկության բացակայության հետ՝ NEWS.am–ի թղթակիցը հարցումով դիմել էր Երեւանի քաղաքապետարան, որին ի պատասխան քաղաքապետերանից հայտնում են, որ խորհրդատու WYG ընկերության կողմից կատարվում են Երեւան քաղաքի հասարակական տրանսպորտի նոր ցանցի վերջնական շտկումները՝ հաշվի առնելով մասնագիտական խմբի առաջարկներն ու դիտողությունները։ Այնուհետեւ, ապահովելով գործընթացի հրապարակայությունն ու թափանցիկությունը, հասարակական տրանսպորտի նոր ցանցի վերջնական նախագիծը դրվելու է հանրային քննարկման եւ իրականացվելու են հանրային լսումներ։
Այսինքն, այս պահին, որպես բարեփոխումների կարեւորագույն մեկնակետ, մասնագետների, նաեւ հանրության ուշադրության կենտրոնում է հասարակական տրանսպորտի նոր ցանցի նախագիծը, որի ամբողջականացման եւ վերջնական հաստատման պարագայում է միայն հնարավոր անցնել հաջորդ փուլերին, որոնք վերաբերելու են նոր ինտեգրվող հանրային տրանսպորտի ցանցում միջազգային չափորոշիչներին համամապատասխանող տրանսպորտային միջոցների ներդրման խնդիրներին եւ ծախսերի հաշվարկմանը (ներառյալ վարորդների աշխատավարձը), տարբերակված սակագների կիրառմանը, միասնական տոմսային համակարգի ձեւավորմանը, անկանխիկ վճարումների ձեւերին, էլեկտրոնային տոմսերի վաճառքի անցման հնարավորություններին, տոմսերի առք ու վաճառքի (անհատականացված կամ ոչ անհատականացված հպումային, անհպումային կամ չիպային սմարթ քարտեր) եւ ուղեվարձի ավտոմատ գանձման համակարգին (AFC) եւ, ընդհանրապես, մայրաքաղաքի հասարակական տրանսպորտային համակարգի արդյունավետ էլեկտրոնային կառավարման ու վերահսկման մախանիզմներին:
Ինչ վերաբերում է ծրագրի իրականացման համար պոտենցիալ ներդրողներին, ապա այդպիսիք, գործընթացին մասնակցելու իրենց մտադրությունների մասին կարող են հայտարարել հաստատված նոր ցանցի, սպասարկման չափորոշիչների եւ պահանջվող տրանսպորտային միջոցների նախընտրելի տեսակի ու դրանք արտադրող կազմակերպության ընտրությունից հետո հայտարարվող մրցութային փուլում :
Միաժամանակ, Երեւանի քաղաքապետարանից շեշտել են, որ պոտենցիալ ներդրողների բացակայության եւ մրցույթը չկայանալու պարագայում, հասարակական տրանսպորտի բարեփոխումների գործընթացը կանգ չի առնելու եւ այն կիրականացվի Երեւանի քաղաքապետարանի կողմից, վարկային միջոցների ներգրավման միջոցով, որի մասով միջազգային ֆինանսական կառույցների հետ տարվում են տարբեր ձեւաչափի խորհրդակցություններ: