«Առաջին նկարում հին Հայաստանի ուրվականն է, երկրորդում` նոր, արդիական ու հզոր Հայաստանի». Սուրեն Պապիկյան (լուսանկարներ)

Տարածքային կառավարման և զարգացման նախարար Սուրեն Պապիկյանը Facebook-ի իր էջում տեղադրել է լուսանկարներ, որոնցում պատկերաված է Արմավիրի մարզի երեկվա կարկուտի առաջացրած հետևանքները: Դրանցից որոշներում կարկտահարված դաշտերն են, իսկ մյուսներում՝ հակակարկտային ցանցով պաշտպանված դաշտը:

Նախարարը կից գրել է. «Արմավիրի մարզում բնության հերթական աղետից հետո նկարված այս նկարները (առաջին 2-ը կարկտահրված դաշտից, մյուսները հակակարկտային ցանցով պաշտպանված դաշտից) ևս մի անգամ փաստում են, որ առկա ողջ պոտենցիալը պետք է ներդնել ժամանակակից գյուղատնտեսություն ստեղծելու համար, ոչ մի լումա չի կարելի վատնել ավանդական` իրեն սպառած համակարգը կարկատելու, հոգեվարքը երկարաձգելու վրա:Եվ սա վերաբերվում է բոլոր ոլորտներին»:

Նախարարը մանրամասնել է, որ նկարներն արված են կողք-կողքի գտնվող 2 դաշտերում: «Առաջին նկարում հին Հայաստանի ուրվականն է, երկրորդում` նոր, արդիական ու հզոր Հայաստանի»,-ավարտել է Սուրեն Պապիկյանը: