«Մայրիկիս կորցրեցի, երբ պիտի արդեն վայելեի ու երջանկացնեի նրան». Նազենի Հովհաննիսյանն արխիվային լուսանկար է հրապարակել

Դերասանուհի Նազենի Հովհաննիսյանն Instagram-ի իր էջում արխիվային լուսանկարներ է հրապարակել, որտեղ նա նա իր ծնողների հետ է: Դերասանուհին գրել է.

«Պինդ «բռնեք» ձեր ծնողներին։ Երկու ձեռքով ու ամբողջ կյանքով մեկ պինդ բռնեք, քանի կա հնարավորություն։ Մենք շատ ենք անդունդներ ստեղծում՝ սերնդային, գաղափարական, ժամանակային ու մտածողության անիմաստ անդունդներ, ու հեռավորությամբ ենք շփվում մեր ծնողի հետ, կարծելով որ չեն հասկանա, չեն ընդունի կամ կմերժեն մեր ազատախոհությունը։

Ծնողների հետ առաջին հերթին ընկերանալ է պետք։ Հավասարը հավասարի հետ շփվել՝ իբրև ընկեր, և միանշանակ ու անընդհատ մեծարել՝ որպես Ծնող։ Ես Մայրիկիս կորցրեցի, երբ պիտի արդեն վայելեի նրան, թեթևացնեի հոգսն ու երջանկացնեի,,, Ժամանակը երբեք հաշվի չի նստում մեզ հետ։ Հնձում - տանում է մարդկանց, սիրելի թե ատելի՝ չի ֆիլտրում, չի զտում, չի խնայում։ Մենք պետք է խնայենք մեր ծնողներին, անհարկի չխաբենք, չծուլանանք ու չհեռանանք՝ հղում անելով «ժամանակների» կամ «հասկացողությունների» տարբերությանը։ Նրանք վաղուց են ապրել մեր կյանքը, այն էլ՝ մի քանի անգամ, ապրել՝ իրենց ձևով ու պահանջներով, բայց ապրել են: Ընկերանալ է պետք. իսկականը դա է։ Կենացային բաժակաճառերը դնել մի կողմ ու կյանքում՝ գործով, վարվեցողությամբ ու խոսելով հետներն ապրել, չսահմանափակել նրանց ազատությունն ու բաց շփվել։

Ամենամեծ հեղափոխությունը, երբ Ընկերանում ես ծնողներիդ հետ, ջրիկանում երեխայի պես ու հասունների նման խորանում, թե աշխարհն ինչու՞ է էսքան ծուռ... Խոսել, հասկանալ, բացել շերտերը. Մայրերն անհատակ են...

Հունիսի 14- ին Մայրիկիս ծնունդն էր. Էմմա Բլեյան- ի 7 տարվա բացակայությունը ոչնչով չի սփոփվի, չի փարատվի, չի ամոքվի։

Աշխարհի բոլոր մայրերը Սեր են. անսահմանության մեջ մեր ուղեծիրն են ու կարոտը։

Փայփայել է պետք նրանց՝ երեխայի պես։ Սիրել անմնացորդ ու ընկերություն անել սթափ։

Շնորհավոր բոլոր Մայրերի անցած, այսօրվա, կամ գալիք ծնունդները։

Ծնողները միշտ մեզ պահպանում են. այստեղ, թե Երկնքում»։