Էլթոն Ջոնը մոտ ապագայում էլի կգա Հայաստան, այս անգամ արդեն համերգ կտա. Արմեն Սարգսյան
Նախագահ Արմեն Սարգսյանն այսօր լրագրողների հետ զրույցում նշել է. «Էլթոն Ջոնը Հայաստանի բարեկամն է շատ բարզ պատճառով՝ ունի շատ հայ բարեկամներ, որոնցից մեկը ես եմ: Նա ոչ միայն մեծ երգիչ է, այլև մեր մտավորական, ով շատ լավ գիտի Հայաստանի պատմությունը: Ես հիշում եմ, որ երբ Գարեգին Ա վեհափառը մահացավ, Էլթոնը ինձ նամակ գրեց, հանդիպեցինք և քննարկում էինք հայ քրիստոնեության պատմությունը: Երկրորդ, աշխարհահռչակ երգիչ լինելուց զատ, նա հսկայական բարեգործական աշխատանք է տանում՝ ուղղված ՁԻԱՀ-ով հիվանդներին աջակցելուն:
Այսօրվա մեր ծրագրի մեջ մտնում է այն, որ Էլթոն Ջոնը և «Երևան, իմ սեր» մեր ծրագրով աջակցում են լսողության խնդիրներ ունեցող ոչ միայն երեխաներին, այլև մեծերին: Յուրաքանչյուր երեխային, որ այդ սարքը դնում են և նա առաջին անգամ սկսում է լսել, ցանկացած մարդ կարող է հուզվել»,-նշել է Արմեն Սարգսյանը՝ հավելելով, որ Էլթոն Ջոնը մոտ ապագայում էլի կայցելի Հայաստան, ընդ որում, այս անգամ արդեն ոչ միայն բարեգործական ծրագրեր իրականացնելու, այլև համերգ տալու համար: Այլ մանրամասներ ՀՀ նախագահը չհայտնեց՝ ընդգծելով, որ չի սիրում նախապես խոսել իր ծրագրերի մասին. «Ոչ միայն ինքն է գալու, այլև շատ ուրիշ մեծ արվեստագետներ, երգիչներ: Երբ կգան՝ կտեսնեք: Ինքը հպարտ է, որ այսօր Հայաստանում է»: