Պուտինը խոստացել է՝ ռուսներն ավելի լավ կապրեն (տեսանյութ)

Ռուսաստանի Դաշնության նախագահի պաշտոնը ստանձնած Վլադիմիր Պուտինը շնորհակալություն է հայտնել Ռուսաստանի քաղաքացիներին նախագահական ընտրությունների ժամանակ իրեն տված աջակցության համար և հայտարարել է, որ այն համարում է հսկայական քաղաքական կապիտալ և իր բարոյական հենարանը, գրում է РИА Новости-ն:

«Եվս մեկ անգամ ցանկանում եմ շնորհակալություն հայտնել: Շնորհակալություն այն աջակցության համար, որ դուք՝ Ռուսաստանի քաղաքացիներդ, ինձ տվեցիք նախագահական ընտրությունների ժամանակ: Այն համարում եմ հսկայական քաղաքական կապիտալ և հուսալի բարոյական հենարան: Այդ աջակցությունը հույս ու հավատ է ներշնչում, որ Ռուսաստանը կշարունակի ամրապնդել իր հզորությունը, իսկ մարդիկ ավելի լավ կապրեն»,- ասել է Պուտինը երդմնակալության արարողությանը:

Վլադիմիր Պուտինը հայտարարել է, որ ստանձնելով ՌԴ նախագահի պաշտոնը՝ խիստ գիտակցում է իր հսկայական պատասխանատվությունը ժողովրդի և Ռուսաստանի առաջ:

«Այս րոպեներին ստանձնելով Ռուսաստանի նախագահի պաշտոնը՝ հստակ գիտակցում եմ իմ հսկայական պատասխանատվությունը ձեր բոլորի՝ մեր ողջ բազմազգ ժողովրդի առաջ, Ռուսաստանի՝ հսկայական հաղթանակների և ձեռքբերումների երկրի, ռուսական պետականության հազարամյա պատմության և մեր նախնիների առաջ»,- ասել է Պուտինը Կրեմլում երդմնակալության արարողությանը:

Նա նաև հայտարարել է, որ իր պարտքն է համարում և իր կյանքի իմաստը՝ անել հնարավոր ամեն բան Ռուսաստանի, երկրի ներկայի և ապագայի համար: