Արտահերթ ընտրություններ իրականացնելու մի քանի տարբերակներ կան. Նիկոլ Փաշինյան
ԱԺ հատուկ նիստի ժամանակ ՀՀԿ-ական պատգամավոր Շուշան Սարդարյանը հարց ուղղեց Նիկոլ Փաշինյանին: Սարդարյանը, մասնավորապես, նշեց, որ Փաշինյանը երեկ իր ելույթում անդրադարձել է ընտրական գործընթացների կազմակերպմանը և վերջինիս առաջ քաշած օրակարգում արտահերթ ընտրությունների գնալու համար նախ անհրաժեշտ է փոփոխություններ կատարել ընտրական օրենսգրքում, որի համար պահանջվում է պատգամավորների ընդհանուր թվի ձայների առնվազն 3/5-ը: «Ձեր դիտարկմամբ՝ կունանա՞ք համապատասխան քաղաքական կոնսենսուս և բավարար ձայներ՝ օրենսգիրքը ձեր ցանկալի տարբերակով անցկացնելու համար, եթե ոչ՝ ո՞րն է ձեր հաջորդ քայլը: Բացի այդ՝ դուք ասել եք նաև, որ արտահերթ խորհրդարանական ընտրությունները պետք է իրականացվեն հնարավորինս կարճ ժամկետում՝ վարչապետի ընտրությունից հետո երկու ամսվա ընթացքում: Նշե; եք նաև, որ դրա մեխանիզմները քննարկվում են. կուզեի պարզաբանեք, թե որո՞նք են սահմանադրական այն մեխանիզմները, որ հնարավորություն կտան ընտրություններն իրականացնել ձեր նշած ժամկետում»,-հարցրեց Սարդարյանը:
Ի պատասխան Փաշինյանը նշեց, որ ինքը երբևէ չի հանդգնի ասել, որ ընտրական օրենսգրքում փոփոխություն տեղի ունենա, ինչպես Սարդարյանն ասաց, իր ուզած տարբերակով: Փաշինյանի խոսքով՝ ընտրական օրենսգիրքը մի փաստաթուղթ է, որը եթե լայն ընկալում և ըմբռնում չունենա քաղաքական ուժերի և հանրության շրջանում, կկորցնենք կարևոր մի բան՝ անհնար կլինի կազմակերպել այնպիսի բան, որ մենք ուզում ենք: «Իսկ մենք ուզում ենք, որ ընտրությունը լինի անառարկելի արդյունքներով, որ բոլորը ճանաչեն՝ ժողովուրդն ու քաղաքական ուժերը: Բացի այդ՝ մեծամասնության հետ կապված՝ հույս ունեմ, որ բոլորդ նկատել եք, որ մեր հռետորաբանության մեջ ատելությունն ընդհանրապես տեղ չունի, մենք անընդհատ խոսում ենք համերաշխության մասին: Ես ուրախ եմ, որ վերջին 6 տարիներին, լինելով ԱԺ պատգամավոր ու բազմաթիվ հակասություններ ունենալով խորհրդարանական մեծամասնության ներկայացուցիչների հետ, մենք նաև երկխոսության փորձ ենք ունեցել, ինչպես նաև իրար հետ հարցեր լուծելու, և առնվազն միջազգային հարթակներում կարողացել ենք ընդհանուր դիրքորոշումներ ներկայացնել»,-ասաց Փաշինյանը:
Նա նշեց նաև, որ արդեն հայտարարել և հիմա էլ կրկնում է՝ ավարտվել է այն շրջանը, երբ կառավարությունը որևէ մեծամասնության կամ փոքրամասնության ինչ-որ բան է պարտադրում: Փաշինյանն ընդգծեց, որ երբ խոսում է ինչ-որ ծրագրի մասին, իր համար կարևոր է նպատակը, իսկ նպատակն ազատ, արդար և օրինական ընտրությունների անցկացումն է: «Ես ունեմ իմ պատկերացումն ու մեր թիմը, բայց երկխոսության ընթացքում հնարավոր է դուք այնպիսի գաղափար առաջարկեք, որը շատ ավելի էֆեկտիվ ձևով կապահովի ինչ-որ հարցի լուծումը: Մենք պատրաստվում ենք այդ հարցերը լուծել երկխոսության, քննարկումների միջոցով, որովհետև կարծում եմ՝ բոլորս հասկացել ենք՝ ընտրությունների արդյունքների նենգափոխումը բոլորիս է ճգնաժամի բերում»,-ասաց Փաշինյանը:
Սարդարյանն արձագանքեց՝ ասելով, որ եթե ասենք՝ Փաշինյանն ընտրվում է վարչապետ, Սահմանադրությամբ սահմանված ժամկետում ձևավորվում է կառավարություն, հաստատվում է ծրագիր. ո՞րն է լինելու սահմանադրական ճանապարհը՝ արտահերթ ընտրությունների գնալու:
Փաշինյանը նշեց, որ իրականում մի քանի տարբերակներ կան և դրանցից մեկի ընտրությունը կապված է նաև քննարկումերից: «Մեկն, օրինակ, հետևյալն է՝ կառավարությունը ձևավորվում է, բայց խորհրդարանը չի հաստատում նրա ծրագիրը և չի նշանակում նոր վարչապետ: Այդ պայմաններում իրավունքի ուժող լուծարվում է ԱԺ-ն, տեղի են ունենում արտահերթ խորհրդարանական ընտրություններ: Ես չեմ ասում՝ սա սխալ կամ ճիշտ տարբերակ է, ես ուղղակի մեխանիզմներից մեկն եմ նշում: Ճիշտն ասած, Սահմանադրությունը բավական սահմանափակել է այդ հնարավորությունը, բայց կարծում ենք՝ քննարկումներով կարող ենք գտնել լուծում»,-ասաց նա:
Փաշինյանն իր խոսքն ամփոփեց՝ ասելով, որ ընդունում է՝ այստեղ էլ չպետք է լինի իշխանության կամ կառավարության պարտադրանքի որևէ մեթոդաբանություն.«Ես հավատում եմ, որ քաղաքական անհրաժեշտություններն արձանագրելով՝ մենք կարող ենք գալ ընդհանուր հայտարարի»: