«Ինձ համար շատ կարևոր է հայերեն երգելը». Սևակ Խանաղյանը՝ Լիսաբոնում կայացած եվրատեսիլյան առաջին փորձի մասին (տեսանյութ)
Երեկ Սեւակ Խանաղյանն առաջին անգամ Լիսաբոնի եվրատեսիլյան բեմում հանդես է եկել «Քամի» երգի փորձով, որից անմիջապես հետո երգիչը լրագրողների հետ հանդիպում է ունեցել և պատասխանել նրանց հետաքրքրող հարցերին, որոնք բազմազան էին՝ սկսած երգի հայերեն ընտրությունից մինչև Սևրակի արտաքին կերպարը:
«Առաջին փորձս շատ լավ անցավ, դրական էներգիա կար, ինձ շատ է դուր եկել այստեղի մթնոլորտը: Անհամբեր սպասում եմ մյուս փորձերին: Փորձը մեզ դուր է եկել, բայց, իհարկե, կան որոշ մանրուքներ, որոնք կշտկենք ևւ ամեն ինչ մեր սրտով կդարձնենք»,-նշել է երգիչը:
Անդրադառնալով հայալեզու իր ստեղծագործությանը՝ Սևակն ասել է.
«Ինձ համար շատ կարևոր է սկզբից մինչև վերջ հայերեն երգելը, որովհետև «Եվրատեսիլն» այն մրցույթն է, որի ընթացքում երկրները կիսվում են իրենց մշակույթով: Իմ կարծիքով լավագույնս դա կարելի է անել հենց լեզվի միջոցով»:
Լրագրողներին հետաքրքրել է նաեւ Սևակի ոճը: Երգիչը նշել է, որ թրենդներին երբեք չի հետևել, իսկ նորաձև մորուքն արդեն 7 տարի է, ինչ պահում է:
Շատերի աչքից չի վրիպել նաև այն փաստը, որ Սևակի որդին՝ Բագրատը, ևս հետաքրքրված է երաժշտությամբ: Հարցին՝ արդյոք հնարավո՞ր է նա եւս ընտրի հայրիկի ուղին, երգիչը պատասխանել է.
«Կցանկանայի, որ նա դառնար երաժիշտ: Չեմ կարող ասել, թե ինձ պես հաճախ է երգում, բայց երաժշտություն սիրում է: Ինձ համար կարեւորը, որ նա դառնա լավ ու արժանի մարդ: Իսկ, թե ինչով կզբաղվի, դա այնքան էլ կարևոր չէ»: