Ի՞նչ կլինի, եթե վարչապետ ընդհանրապես չընտրվի, և ինչ է սպասվում, եթե ԱԺ-ն միաձայն վարչապետ ընտրի Նիկոլ Փաշինյանին
Վարչապետն արտահերթ ընտրություններ նշանակելու լիազորություն չունի!!!
Խորհուրդ Հանրապետականներին՝ միասնական քվեարկեք Նիկոլ Փաշինյանի վարչապետ դառնալու օգտնին և ամեն գնով փայփայեք ձեր ներկուսակցական միասնությունը:
Խորհուրդ Նիկոլ Փաշինյանին՝ հրաժարվեք այս պահին վարչապետ դառնալուց և խորհրդարանական կառավարման համակարգ ունեցող երկրում հասեք իրական հեղափոխության՝ արտահերթ խորհրդարանական ընտրությունների:
Ի՞նչ կլինի, եթե վարչապետ ընդհանրապես չընտրվի: ՀՀ սահմանադրության 149-րդ հոդվածի համաձայն իրավունքի ուժով կարձակվի Ազգային ժողովը և կնշանակվի արտահերթ խորհրդարանական ընտրություններ: Նիկոլ Փաշինյանի թիմը, եթե մենք չենք ապրում Հյուսիսային Կորեայի ընտրական համակարգ ունեցող երկրում, 90% հավանականությամբ, այսօրվա ունեցած վարկանիշի պայմաններում, խորհրդարանում ձեռք կբերի մեծամասնություն, Նիկոլ Փաշինյանը կընտրվի վարչապետ և խորհրդարանում ունենալով մեծամասնության աջակցությունը՝ հանգիստ կկառավարի երկիրը: Հանրապետականները կամ ընդհանրապես խորհրդարան չեն մտնի, կամ կդառնան փոքրամասնություն:
Ի՞նչ կլինի, եթե Ազգային ժողովը մայիսի 1-ին միաձայն վարչապետ ընտրի Նիկոլ Փաշինյանին, իսկ Հանրապետականները պահպանեն իրենց միասնությունը: Նա կդառնա Վարչապետ: Խորհրդարանում մեծամասնություն կմնա միասնական Հանրապետականը, որը ջանք չի խնայի Վարչապետի ցանկացած նախաձեռնություն ժողովրդի առջև սևացնելու համար:
Բոլոր լուրջ մարմինները և պաշտոնները (Կենտրոնական ընտրական հանձնաժողով, Գլխավոր դատախազ, Բարձրագույն դատական խորհուրդ և այլն) կազմավորվում կամ նշանակվում են Ազգային ժողովի կողմից և Վարչապետը լիազորություն չունի որևէ փոփոխություն կատարելու:
Մի քանի ամիս հետո Կառավարության կողմից ներկայացված ցանկացած օրենք, այդ թվում Ընտրական օրենսգրքի հետ կապված, Խորհրդարանը կամ չի ընդունի կամ կընդունի մեծ դժվարությամբ: Չեմ կարծում, որ արդեն վարչապետ Նիկոլ Փաշինյանը ամեն օրենքի ընդունման համար դիմի փողոցային պայքարի: ՀՀ սահմանադրությամբ չկա կարգավորում, որը Վարչապետին հնարավորություն է տալիս արձակել Ազգային ժողովը: Այսինքն, այժմ, որ Նիկոլ Փաշինյանը խոստանում է, որ որոշ փոփոխություններից հետո նշանակվելու են արտահերթ ընտրություններ, մեծ հարցական է, և ոչ միայն նրա համար, որ կարող է կորած լինել վարչապետի շահագրգռվածությունը, այլ նրա համար, որ Վարչապետը, եթե չունի մեծամասնության աջակցությունը, չի կարող կազմակերպել այդ ընտրությունները: Իսկ մեծամասնություն կազմող հանրապետականներին անկասկած անհրաժեշտ չի լինի արտահերթ ընտրություններ:
Սահմանադրության 115-րդ հոդվածի համաձայն՝ Վարչապետի նշանակումից 1 տարի հետո Ազգային ժողովը կարող է անվստահություն հայտնել նրան և ընտրել նոր Վարչապետ:
Մեկ տարի հետո հնարավոր է կորած լինի այսօրվա համազգային էյֆորիան, ռոմանտիկան և ոմանց մոտ նաև ֆանատիզմը:
Մեկ տարի հետո, այժմ «Նիկոլ վարչապետ» վանկարկող անձանցից շատերը հնարավոր է չունենան այն սոցիալական դրությունը, որը պատկերացնում են, որ հաստատ ունենալու են պարոն Փաշինյանի վարչապետ դառնալու դեպքում:
Մեկ տարի հետո Աստված գիտի, թե ինչ կլինի…
Իսկ այդ մեկ տարին, մեր երկիրն ունենալու է խորհրդարանի աջակցությունը չվաելող, թեկուզ ժողովրդական վարչապետ, ինչը, պահելով երկրի քաղաքական կյանքը անորոշության մեջ իր բացասական ազդեցությունն է ունենալու, թե ներդրումների, թե անվտանգության, թե կայունության վրա:
Այնպես որ, նորից պետք է նշեմ, որ եթե պարոն Սարգսյանի հիմնական սխալն էր օր առաջ ամեն գնով վարչապետի պաշտոնին հասնելը, պարոն Փաշինյանի դեպքում սխալի բովանդակությունը չի փոխվել:
Տեսեք, պարոն Փաշինյան, հետո չասեք, ես սխալվեցի, Լևոնը Սահակյանը ճիշտ էր:
Լևոն Սահակյան. Ֆեյսբուք