Գլխավոր դատախազությունը հրապարակել է այս տարվա ընթացքում զինված ուժերում մահվան դեպքերի թիվը
2018թ. ընթացքում ՀՀ զինված ուժերում և ԱՀ ՊԲ-ում զինվորական ծառայություն անցնելու հետ կապված արձանագրվել է մահվան ելքով 9 դեպք՝ 2017թ. նույն ժամանակահատվածին գրանցված՝ 17 դեպքի դիմաց:
Ֆեյսբուքյան իր էջում նման տվյալներ է հրապարակել ՀՀ գլխավոր դատախազի ԶԼՄ-ների հետ կապերի գծով խորհրդական Գոռ Աբրահամյանը՝ արձագանքելով ՀՔԱՎ գրասենյակի 2018թ. առաջին եռամսյակում ՀՀ և ԱՀ զինված ուժերում մահվան դեպքերի վերաբերյալ հրապարակմանը:
Գրասենյակի տարածած տեղեկատվության համաձայն,, 2018-ի առաջին եռամսյակում զինված ուժերում արձանագրվել է 11 մահացության դեպք:
«Այդ տվյալները որոշ չափով չեն համապատասխանում պաշտոնական տվյալներին»,-նշել է Գ. Աբրահամյանն ու մանրամասներ ներկայացրել.
1. Ադրբեջանի ուժերի կողմից սպանություններ շփման գծում՝ 3 (2017թ.՝ ութ)
2. Ինքնասպանություններ և ինքնասպանության հասցնելու դեպքեր՝ 1 (2017թ.՝2)
3. Հիվանդություններից՝ 2 (2017թ.՝ 2)
4. Ծառայության հետ կապված ավտովթարներից՝ 1 (2017թ.՝1)
5. Դժբախտ պատահարներից՝ 1 (2017թ.՝ 2)
6. Զենքի օգտագործման կանոնների խախտումներ՝ 1(2017թ.՝ 2)։
Նշված ժամանակահատվածում սպանության դեպք չի արձանագրվել։
2018թ. 1-ին եռամսյակում ՀՀ զինված ուժերում և ԱՀ ՊԲ-ում զինվորական ծառայություն անցնելու հետ չկապված արձանագրվել է 6 դեպք՝ 2017թ. նույն ժամանակահատվածին գրանցված 3 դեպքի դիմաց: Այդ թվում՝
1. Հիվանդություններից՝ 2 (2017թ.՝ 2)
2. Ծառայության հետ չկապված ավտովթարներից՝ 4 (2017թ.՝ արձանագրվել է 1 դժբախտ պատահարի դեպք):
«Հ.Գ. Թե՛ բարոյապես և թե՛ հոգեպես դժվար և խորթ է բանակում մահացության ցավալի դեպքերին մոտենալ վիճակագրության դիրքերից: Սակայն հաշվի առնելով հանրային միանգամայն հասկանալի զգայուն և պահանջկոտ վերաբերմունքը՝ այլ տարբերակ ուղղակի չի մնում»,-գրել է նա:
Անդրադառնալով հրապարակմանը, որտեղ ՊՆ մեղադրվում է «Զինված ուժերում զինծառայողների մահվան դեպքերը միտումնավոր թաքցնելու ու մահացությունների վերաբերյալ հանրությանը ոչ ամբողջական և ոչ ճշգրիտ տեղեկատվություն տալու համար», ՊՆ մամուլի խոսնակ Արծրուն Հովհաննիսյանը ֆեյսբուքյան իր էջում գրել է.
««Գրդոնչիների» հերթական մանիպուլյացիան։ Մարդկանց զգացմունքների հետ մի խաղացեք, ես անձամբ ձեզ բազմիցս ապացուցել եմ, որ դուք իրավիճակին երբեք չեք տիրապետել։ Ինչ, որ կտորներ պոկելով իրականությունից ճշմարտության տեղ մի մատուցեք։ ՀՀ ԶՈւ-երում ոչ մի մահ չկա, որ թաքցրած է։ Նախ դա մեր գործելաոճը չի, երկրորդ դա անհնար է և երրորդ. եթե դուք նման մի դեպք գտնեիք, ապա ձեր հիսթերիան հիմա հասել էր մինչև Մարս։ Ամեն տարի նույնն եք անում։ Զորացրված զինծառայողի մահը տանը գրանցում եք բանակի մահ ու այն էլ թաքցրած։ Տանը ինֆարկտից մահացածին հաշվում եք թաքցրած մահ և այսպես շարունակ»: